Minister Wyatt-Ras:
- Elogio pa e fundacionnan cu ta atende cu adictonan riba caya y cu bon acogida
ORANJESTAD (AAN)-- “Nos tin cu bisa cu adictonan tambe ta sernan humano, y hopi biaha un situacion cu a bay for di man a pone nan drenta den adiccion, y nan ta riba caya pasobra nan no por bay bek nan cas; nan no ta bon bini eynan”, Minister di Salud y Asunto Social a relata, den entrevista cu DIARIO.
Minister Wyatt-Ras a comenta cu tin biaha ta historianan tristo, cu ta pon’e pensa con nos comunidad por biba cu otro, y cu mester preveni.
“P’esey, fundacionnan, manera FADA, ta hopi importante pa duna informacion prome cu e persona bira adicto. Hopi biaha e ta cuminza na un edad mas jong, y indicacion ta mustra cu e grado di adiccion ta cuminza na un edad mas y mas hoben. Kiermen, nos mester preveni y hopi biaha ta cuminza den e mesun hogar. Tin biaha e mesun mayornan ta laga nan yiunan bay den alcohol, y tin biaha na droga, y nan ta participe tambe di locual mayornan ta haci. Hopi biaha muchanan ta siñando door di ehempel, di locual nan ta mira, y nan no por bisa no na momento cu nan ta wordo confronta cu esey riba caya. Pues, e ta un esfuerzo, no solamente di gobierno, pero di henter nos comunidad pa nos por domina e adiccion pero tambe duna informacion pa nos hobennan por tuma un bon decision, na momento cu nan ta confronta pa personanan riba caya pa nan cumpra droga”, Minister Wyatt-Ras a vocifera.
El a bisa, finalmente, cu esaki ta un situacion cu nos tin cu biba cu ne, y el a expresa palabranan di elogio pa e fundacionnan cu ta atendiendo cu e situacion aki y mas cu aworaki nan mester atende cu adictonan riba caya, y tin e miho acogida pa nan.
