Director di DOW, ing. Marlon Croes a confirma:
ORANJESTAD (AAN)-- Director di Departamento di Obranan Publico, Ing. Marlon Croes, a convoca un conferencia di prensa den cual el a elabora tocante e situacion di e incinerator na Parkietenbos y con ta bay remedia esaki.
Ing. Croes a cuminza bisando cu ta core den diferente medio social, cu e incinerator no ta den funcion, locual ta cuadra cu realidad. El a splica cu for di dia 8 di September, e incinerator a haya un “break down”, pa cual motibo DOW a haci un evaluacion dia 12 di September, pa wak kico ta e defecto cu tin y a constata cu e “prime chamber” di e incinerator ta den hopi mal estado.
Den luz di esey DOW a haci e trabao di biaha pa wak kico ta e miho manera pa nos por pone e incinerator draai bek, den un tempo hopi mas cortico. E motibo ta cu cada dia cu ta keda sin opera nan ta haya acumulacion di sushi cu riool ta produci. Nan a haya dos opcion riba mesa, un ta pa cumpra un “prime chamber” nobo, na un prijs basta halto, y cu den tres pa cuater siman e incinerator por draai bek, y e otro opcion ta drech’e cu betonwerk , cu ta bay tarda cinco siman plus. Kiermen e ta tarda mas tanto y esey ta haci e riesgonan mas grandi.
Como tal, DOW a aconseha gobierno pa cumpra un pieza nobo, pa cual e destaho a tuma lugar e siman aki, y e ta riba shipping pa e yega Aruba, pa wordo instala pa pone draai bek den tres pa cuater siman.
“Bisando esey, nos por trece e incinerator bek den operacion, pero e ta un incinerator cu su so ta draai, y nos no tin redundancia den e sistema. Nos ta den un proceso pa haci un ehercicio aworaki tambe, pa nos por crea redundancia reliability den e operacion, pa adkiri un of dos incinerator mas, pa nos garantiza operacion continuo”, director di DOW ing. Marlon Croes a menciona, indicando cu nan ta baha e volumen di cierto tipo sushi pa proces’e na un manera responsable y evita e riesgo cu ta trece cune.
