Thomas Ruiz, Secretario di Vereniging Rijscholen Aruba (VRA)
ORANJESTAD (AAN): Diamars mainta un biaha mas miembronan di Vereniging Rijscholen Aruba (VRA) ta confronta e incapacidad y mal maneho di Bureau Examen Rijbewijs (BER) na Santa Cruz cu ta perhudicando nan miembronan y hopi hende den nos comunidad, Secretario di VRA, Thomas Ruiz a señala den un entrevista cu DIARIO.
Ruiz a bisa cu BER tin solamente 2 persona pa pasa e praktijk examen y no tin personal pa inscribi pa saca rijbewijs of otro servicionan.
Ruiz a enfatisa cu BER no por duna e fecha cu un persona por inscribi pa saca su rijbewijs of haci uso di e otro servicio cu no ta pasa e praktijk examen.
VRA ta condena cu BER no comunica esaki na tempo cu VRA ni ta publica esaki riba e Facebook di KPA y no ta manda anuncio relaciona cu e situacion pa miembronan di prensa. Tambe VRA ta condena e hecho cu BER atrobe no ta mustra ningun clase di empatia cu e situacion, cu ta perhudica hopi hende den nos comunidad y comercio den varios sentido.
Pa colmo VRA no por haya contacto cu Gordon ni cu Arnhem pa por dialoga pa bin cu un solucion pa cu e situacion aki.
VRA ta keda positivo cu Minister di Husticia por interveni mas lihe posibel pa soluciona e situacion aki.
