CAft: “Actua awo pa reforsa finansa publico y economia”
*Ta recomenda pa tuma medida, pa cuido di salud y seguridad social
ORANJESTAD (AAN): Diabierna atardi e representantenan di CAft tabata na Aruba y durante un conferencia di prensa a wordo treci dilanti cu economia di Aruba ta creciendo considerablemente desde 2021.
Na 2023, segun e ultimo cifranan di Fondo Monetario Internacional (IMF), e economia lo crece cu 8 porciento.
Pa 2024 ta spera un crecemento di 3 porciento. E recuperacion fuerte aki, acompaña cu medida
fiscal, ta traduci den entrada di belasting y di prima substancialmente mas cu lo locual tabata
presupuesta.
Segun CAft, e entradanan inespera ta considerable, tanto pa pais como pa otro entidad di
sector colectivo. Importante ta pa Aruba gara e momentum pa pone finanzas publico
structuralmente na ordo y haci e economia mas resiliente. Esey por logra door di hiba un
maneho presupuestario prudente, uza entrada inespera pa reduci e debe publico (83
porciento di e PIB na 2023) y hasi inversion cu ta fomenta crecemento. Reforma structural
den salubridad y seguridad social tambe ta aporta na mas resiliencia.
A presenta e proyecto presupuestario pa 2024 na tempo. Esaki ta reforsa derecho presupuestario di
Parlamento. Sin embargo, contrario na e ciclo presupuestario, tin retraso pa loke ta trata informacion
tocante ehecucion y dunamento di cuenta. Ta premira cu entrada inespera den 2023 lo impulsa e surplus
financiero di sector colectivo mucho mas cu e norma di 1 porciento di e PIB. E posicion financiero ta
faborable riba corto plaso, pero tin riesgonan considerabel. E gastonan di interes, cu ya caba tabata
representa 16 porciento di e presupuesto, lo ta hopi mas cu locual a presupuesta. Esaki ta pa motibo cu
e refinanciamento di e prestamo pa ayudo di likides ta mas caro. Como consecuencia, mas cu nunca e
gastonan di interes ta desplasa otro gasto of inversion necesario, y control di gasto ta sigui ta hopi
importante.
CAft su pensamento ta tambe cu inversion ta necesario pa haci e economia mas resiliente y aumenta e capacidad pa genera
entrada.
Aruba a tuma prome bon paso pa haci su sistema fiscal mas robusto cu e Plan Fiscal 2023. Sin embargo,
e sistema di belasting indirecto ta keda fragmenta y door di esey innecesariamente compleho. Colegio di
supervision financiero di Aruba (CAft) ta sigui encurasha, conforme e Pakete Nacional y e
recomendacionnan di IMF, pa simplifica e sistema di belasting indirecto y introduci Impuesto riba Balor
Agrega (IBA/btw) riba corto plaso, manera previamente anuncia. Un sistema mas simpel tambe lo
beneficia cumplimento fiscal. Ta importante pa Aruba aumenta cumplimento fiscal pa garantiza un
distribucion di carga mas ekilibra y asina ei crea espacio presupuestario adicional pa mas inversion cu ta
fomenta crecemento.
Door di desaroyo demografico, si no cambia maneho, e gastonan di cuido y pensioen di biehes lo sigui
aumenta, locual lo genera deficit den futuro. Pa controla gasto den cuido di salud, Algemene
Ziektekosten Verzekering (AZV) ta considerando un marco di gasto. En principio, CAft ta na fabor di un
marco di gasto, di forma cu ora economia ta bayendo bon por acumula e surplusnan y esey por sirbi
como reserva durante contratempo economico. Sin embargo, ta importante cu e marco di gasto no ta
demasiado amplio y cu ta aplica esaki solamente pa contene crecemento di gasto di cuido di salud.
Hustamente awo cu tin surplus enorme, CAft ta recomenda pa tuma medida, pa cuido di salud y
seguridad social por sigui ta pagabel pa e generacionnan futuro.
