Señora Carolina Span di Fundacion Autismo Aruba:
ORANJESTAD (AAN): Cada mucha merece un luga unda e por siña, crece y sinti cu e ta pertenece. Pa muchanan cu autismo, inclusion den scol regular, ta un paso esencial pa nan desaroyo social y academico. Ora nan wordo duna e oportunidad pa participa den un ambiente inclusivo, nan no solamente ta florece, pero tambe ta contribui na un comunidad mas humano y husto.
Carolina Span di Fundacion Autismo Aruba (FAA), a enfatisa cu ta di gran importancia pa mas tanto posibel mucha cu autismo keda integra den educacion regular. Sinembargo, el a bisa cu esaki ta exigi un expansion serio di e sosten y apoyo cu educadornan tin mester den klasnan.
El a pone enfasis riba e necesidad di mas asistente den klas y haci e klasnan mas chikito. Segun Span, gobierno a implementa medidanan similar den pasado cu a mustra resultado positivo, pero esaki mester wordo formalisa y regula pa asigura cu klasnan no tin mas di 24 mucha.
Ademas, educadornan mester haya e sosten cu nan tin mester na e momento cu nan tin mester. Esaki ta inclui asistentenan cu por dedica mas atencion na muchanan cu necesidad special, y tambe un fortalecemento di teamnan di cuido na tur scol. Actualmente, hopi scol ta comparti trahadonan social y psicologonan, pero segun Span, e modelo aki no ta suficiente pa cubri e demanda creciente.
“E demanda den cada scol ta creciendo y lo ta ideal pa tin teamnan di cuido cu ta mas accesibel y disponibel pa cada scol”, señora Span a expresa
Por conclui, cu solamente cu un sistema di sosten mas solido y structural, Aruba lo por garantisa un educacion berdaderamente inclusivo pa tur su muchanan.
