Minister Geoffrey Wever encuanto NSS
ORANJESTAD (AAN): E siman aki, Minister Geoffrey Wever a reuni cu Centraal Bureau Statistiek (CBS) encuanto e avancenan den implementacion di e Sistema Nacional di Estadistica (Nationaal Statistisch Systeem (NSS).
Den colaboracion, Aruba y Hulanda, por medio di e Landspakket, a haci un inversion di 5.9 miyon florin na 2023 pa cu e proyecto aki. Ya caba a haci diferente stapnan manera prepara e ley di e NSS, a haci compra di hardware y software necesario, creando e plataforma digital di data y a duna entrenamento necesario pa por logra esaki.
Un Sistema Nacional di Estadistica ta di importancia pa desaroyo sostenibel di un pais y ta un elemento indispensabel pa un sociedad democratico. A base di e dato nan aki “live” riba e situacion economico, demografico, social y medio ambiental decisionnan mas concreto y mihor informa por wordo tuma door di, entre otro, nos gobernantenan. Pero tambe Parlamento, publico en general y inversionistanan por usa e sistema aki.
Pa logra e meta aki, e estadisticanan oficial mester cumpli cu rekisito internacional cu tin di haber cu e relevancia, confiabilidad, actualidad y uso practico di e dato produci. Alabes e dato mester wordo haci publico di manera imparcial y di manera comprendibel pa cada persona. Pa e motivo aki lo traha di manera participatorio na identifica e estadisticanan oficial cu ta necesario pa Aruba.
Implementacion di e Sistema Nacional di Estadistica di Aruba ta parti di e vision di maneho di Minister Wever y manera menciona parti tambe di e Landspakket Aruba. Diferente investigacionnan a tuma lugar den pasado door di organisacionnan internacional manera “United Nations” y “International Monetary Fund” cu a mustra e importancia di establece un Sistema Nacional di Estadistica na Aruba.
E Sistema Nacional di Estadistica Centraal Bureau Statistiek (CBS) y otro productor di estadistica oficial den nos aparato gubernamental por garantisa produccion di un gran variedad di estadistica oficial di calidad halto, relevante y actual pa asina esaki forma ub fundeshi solido pa formulacion, evaluacion di maneho pa un desaroyo sostenibel.
“Mi ta hopi contento cu e avancenan den implementacion di e Sistema Nacional di Estadistica. Por mira cu pasonan concreto ta ser tuma pa hiba maneho di pais Aruba na un forma mas profesional y moderno cu sistemanan eficiente, efectivo, participativo y transparente. Al final esaki lo yuda entre otro Gobierno haci uso di fondonan mas efectivo. Mi kier a gradici Centraal Bureau Statistiek (CBS) y Nationaal Statistisch Systeem Commissie pa e trabounan haci, pa asina Aruba por tin un Sistema Nacional di Estadistica basa riba ley”, Minister Wever a bisa, “ Alabes mi kier gradici Hulanda, cu por medio di e Landspakket a yuda Aruba cu fondo pa implementa e Sistema Nacional di Estadistica.”
