Parlamentario John Hart:
ORANJESTAD (AAN): Recientemente International Monetary Fund (IMF) a publica un rapport cu ta confirma cu e pasonan cu gobierno ta tumando ta riba bon caminda. Ta un echo cu nos ciudadanonan a wak nan poder di compra bay atras na un manera abusivo bao di e maneho di Gabinete Wever-Croes I y II.
Di un aumento di BBO y introduccion di BBO na frontera riba tur producto y servicio, te na kita remedi di nos grandinan; tur esaki den combinacion cu aumento drastico di awa y coriente y tambe prijs di gasolin cu tabata tin un impacto hopi grandi den cartera di nos ciudadanonan.
IMF ta sostene e liña di pensamento di gobierno di Aruba cu e pais mester, of tin un progreso economico, y cu esaki mester ta reparti hustamente bou di pueblo. Parlamentario Hart ta enfatisa cu tabatin necesidad den nos pueblo pa prosperidad ta comparti y pa poder di compra di nos ciudadanonan mehora.
Hopi di nos barionan a bay den decadencia; p’esey awe bo ta wak bek limpiesa den nos barionan, aumento di reparatietoeslag pa nos grandinan, bahada di accijns riba gasolin y diesel cu 10 cen desde 1 di mei 2025 y mayoria remedinan esencial cu a kita for di e lista positivo di AZV na 2021, a duna bek pa pueblo. “Nos no ta ainda caminda nos kier ta, pero nos ta mas leu di unda nos tabata ” asina Hart a expresa.
E esencia di presupuesto 2026 ta enfoca riba mehora poder di compra, stimula comercio y hisa calidad di bida riba tur tereno. Fraccion di AVP a scrutina e presupuesto 2026 den concepto extensivamente y a manda diferente pregunta relaciona cu e presupuesto 2026 pa Gobierno di Aruba tambe tocante e Fondo di Inversion. Loke IMF ta destaca ta cu esaki ta forma parti di e maneho di e gobierno di Aruba.
E Fondo di Inversion ta un instrumento di maneho di gobierno pa cada aña pone e sumanan publico disponibel y inverti esakinan na beneficio di Aruba su desaroyo. “Mester duna e beneficio di desaroyo economico bek na nos comunidad, p’esey mester inverti structuralmente den embeyecemento di districtonan, den centro di Oranjestad y San Nicolas, casnan social y pa adultonan mayor, transicion di energia, desaroyo di tereno di e ex-refineria pa menciona algun inversion importante. Pero inverti solamente no ta suficiente, nos mester tin un mentalidad tambe pa mantene locual cu nos ta inverti den dje" Hart a enfatisa.
