ORANJESTAD (AAN): IDEA (Desaroyo pa Empresa Arubano), un unit di Departamento di Asuntonan Economico, Comercio y Industria,
ta organizando e workshop ‘Silver Entrepreneurship’, cu ta un workshop gratis pa pensionado of personanan cu pronto ta bay cu pensioen.
Durante un conferencia di prensa Dialuna atardi, Judella Trim, Business Development Advisor di Departamento Economico, a splica cu e workshop ta pa esnan cu ta cay den e grupo menciona cu kier bira un entrepreneur.
“E workshop aki lo wordo presenta door di diferente profesionalnan den diferente ramo”.
E dianan aki e oradornan lo yuda bo brainstorm bo ideanan y hasi bo ideanan bira realidad, segun Trim.
Un di e oradornan ta Dave Martinus, Certified Business Coach pa ActionCOACH, kende lo papia riba kico ta encera entrepreneurship.
Banda di esaki IDEA lo elabora tocante tur nan servicio- y trainingnan/ curso cu nan sa ofrece na clientenan y tambe lo presenta y duna guia pa traha bo ‘Business Plan.
E asina yama DEZHI, afdeling di Vestiging van Bedrijven lo papia riba tur e tipo di vestigingsvergunningen (permisonan pa establece un negoshi) cu tin y cu bo lo por aplica na e departamento aki.
Douane ta bay tey tambe y lo papia tocante Agricultura, Cria y Pesca, companianan industrial, Vrijstelling, importacion y exportacion.
Trim a menciona tambe cu Gayle Arends, Policy Advisor Sustainable Development Planning na Departamento di Asuntonan Economico, lo elabora riba con pa aplica e tema sostenibilidad den bo negoshi.
Notaris Johnson riba e dia aki lo presenta temanan di: bedrijfsvormen (eenmanszaak/ NV/ VBA), bedrijfsopvolgingen (diferencia den companianan) ora cu bo lo kier cuminsa un negoshi y tambe lo presenta tocante testamenten/ nalatenschap (kico por laga atras y pa ken).
SVB lo duna un presentacion tocante wergevers- en werknemers verzekering (primanan social), mientras cu Benny Richardson lo papia y mustra e importancia pa ta exitoso den bo bida personal, door di biba un bida saludabel (come saludabel y sport).
“Tur esaki ta bo mindset pa ta un entrepreneur exitoso”, segun Trim.
Futura tambe ta bay tey y lo presenta con pa aplica innovacion den bo negoshi, mientras cu Santa Rosa lo papia riba con bo por hasi di agricultura bira comercial. Tambe lo tin intercambio di experiencia di e siguiente personanan: Susie Franken, propietario di Djiespie’s Place, lo duna su storia di exito;
Lionel Rumnit, kende ta specialisa como Job Coach na ‘Trampolin pa Trabao’,lo conta, con e ta train e personanan incapacita pa den futuro por drenta den mercado laboral den nos sociedad.
Sandra Brown lo elabora tocante su storia di exito di tin un cas di anciano, Merrill Robles (un pensionado lo papia riba con e ta yuda comunidad pa medio di un negoshi y pafor di un negoshi.
E workshopnan aki lo ta completamente gratis y tuma lugar dianan 20 pa 24 Juni entre 8:15 a.m. pa 12:30 p.m na Departamento di Asuntonan Economico, Comercio y Industria na Sun Plaza, di dos piso, sala # 25.
