ORANJESTAD (AAN): Desde 21 te 24 di October 2025, Team SaBoNumber (SBN) cu ta un colaboracion entre Praktijkondersteuners Huisartsen (POH),
Directie Volksgezondheid (DVG) y Instituto Biba Saludabel y Activo (IBiSA), a duna nan sosten na e workshop pa maestro nan di SKOA, cu a tuma lugar na diferente localidadnan.
Durante e dianan aki, Team SaBoNumber, a duna servicio di chekeo di salud na e maestro cu a participa na e sesionnan.
Team SBN a duna e chekeonan di salud siguiente: Dia 21 di October na St. Paulus School na San Nicolas. Dia 22 di October na Colegio San Antonio MAVO na Santa Cruz. Dia 24 di October na St. Aloysius School na Noord.
Durante e chekeonan, e team a midi: peso, haltura, cintura, BMI, glucose (sucu den sanger) y presion di sanger. Tur participante a ricibi nan resultado mesora y a haya posibilidad pa tuma flyers cu informacion riba cuido di nan salud.
Ademas, Team SBN a worde acompaña pa Aruba Vision Center, cu a duna nan servicio di control di presion di wowo durante e actividadnan.
