Kamilah Dammers di IBiSA
ORANJESTAD (AAN): Hefe suplente deporte escolar, Kamilah Dammers a anuncia cu un biaha mas IBiSA, Comite Olimpico Arubano (COA) y Aruba Bank
ta uni forza pa celebra “Olympic Day 2023”. E evento lo tuma lugar riba diasabra 17 di juni, na cede nobo di Comite Olimpico Arubano, situa na Vondellaan.
Dammers a splica cu e celebracion di e Olympic Day Run lo conta cu participacion den coremento di 200m pa 3000 meter, di mucha di varios scol preparatorio, basico y avansa. Pa prome biaha e Olympic Day Run lo inicia dilanti di e cede nobo di COA, unda lo haci un recorido den area di Vondellaan y becindario. Ta importante pa menciona cu riba e diasabra aki, e caminda di Vondellaan lo ta parcialmente cera for di Plaza Betico te cu Banco di Caribe.
E caredanan ta bay tuma lugar den e sistema di den grupo, debi na e cantidad di participante, cu ta conta cu un maximo di 750 mucha, y e mihor tempo overall di e prome 3 lugarnan den cada categoria di edad pa tanto mucha muher como mucha homber ta esnan cu ta wordo premia cu medaya. E caredanan lo ta di 6'or di mainta pa 10'or di mainta. Mayornan mester tene na cuenta cu e muchanan mester tey presente na e ora stipula menciona den e carta ricibi hunto cu e pakete. Kiermen check e ora bon pa asina no mester keda warda oranan pa e mucha participa.
Por inscribi pa cu e Olympic Day Run 2023 na e siguiente link: https://raceroster.com/events/2023/63472/ibisa-kids-and-youth-run-2023
Presidente di Comision di Atleta, Monica Pimentel, a indica cu na final di cada careda nos muchanan y nan mayornan por disfruta di un exposicion deportivo brinda pa e diferente federacion nan deportivo cu lo expone nan deporte den forma interactivo cu nos muchanan. Esaki lo ta e ultimo actividad di deporte escolar riba e calendario di IBISA e aña aki.
Tamara Waldron, Regional Manager Marketing & Branding di Aruba Bank a bisa cu nan ta sumamente contento di un biaha mas por aporta na e evento aki, y ta urgi mayornan pa inscribi nan yiu pa participa den Olympic Day Run 2023. IBiSA, COA y Aruba Bank ta conta riba un asistencia grandi pa celebra “Olympic Day 2023”cu e Olympic Day Run 2023.
{gallery}IBiSA, Comite Olimpico Arubano y Aruba Bank ta uni forza pa celebra Olympic Day 2023{/gallery}
