ORANJESTAD (AAN): Un compromiso pa reduci desperdicio y proteha e medio ambiente di Aruba ta sigui pa traha hunto
cu socionan importante den e sector di hospitalidad per medio di un iniciativa colaborativo di desperdicio organico.
Ya desde November 2024, Iberostar a firma un Memorandum di Entendimento (MOU) cu socionan clave dentro di e Comite Ambiental di AHATA pa establece un marco di colaboracion pa desaroya y mehora e practicanan di maneho di sushi organico y otro iniciativanan di sostenibilidad den henter e sector di hospitalidad na Aruba.
E acuerdo aki ta mehora e vision comparti pa reduci e impacto ambiental door di desvia sushi organico for di e dump, promove reciclahe, y apoya iniciativanan di economia circular cu ta crea balor na largo plaso pa e isla.
Pa apoya practicanan di maneho di sushi mas sostenibel, Iberostar Aruba a uni forsa cu socionan local pa promove un maneho di sushi mas circular door di un miho separacion di materialnan organico. Cu e sosten di e experiencia di SinBa (Sin Basura Perú) y trahando dentro di un alianza colaborativo cu ta inclui solucionan manera produccion di compost y cuminda pa galiña, e iniciativa aki ta busca pa transforma sushi organico en bes di mand'e pa dump. Door di trece hunto hotelnan, expertonan, y instancianan local, e alianza aki ta demostra con colaboracion por encurasha solucionan practico y circular cu ta beneficia tanto e medio ambiente como e comunidad.
E compost final ta wordo uza den landscaping, agricultura, hardin comunitario, proyectonan di restauracion ecologico, y otro iniciativanan cu ta yuda fortalece e medio ambiente natural di Aruba. Door di tene materialnan organico dentro di un sistema circular local, e alianza aki tambe ta contribui na reduci e emision di gasnan (greenhouse gas) asocia cu e disposicion di sushi na dump.
Pa fortalece e iniciativa aki mas aun, representantenan di e hotelnan cu ta den e colaboracion a bishita Iberostar Selection Bavaro Suites na Republica Dominicana. E bishita aki a ofrece un oportunidad pa observa un operacion di desperdicio organico estableci caba, oportunidad pa intercambia conocemento cu ekiponan di experto, y haya vision practico pa implementa un maneho di sushi organico cu exito dentro di e operacionnan di un hotel.
E bishita a reforsa e valor di colaboracion y a comparti conocemento, demostrando con iniciativanan di sostenibilidad exitoso por keda adapta na circumstancianan local mientras ta inspira ideanan nobo pa Aruba.
Via e alianza aki, Iberostar y su socionan ta demostrando cu sostenibilidad ta mas efectivo ora organisacionnan ta traha hunto. Door di transforma sushi organico den un recurso, e organisacionnan participante ta yudando na construi un economia mas resiliente y circular mientras ta posiciona e industria di hospitalidad como un actor clave den e cuido di medio ambiente y contribuyendo na un miho futuro pa Aruba.
