Diabierna cu a pasa, den algun medio di comunicacion a ser raporta den forma comun y coriente un noticia como lo siguiente:
“Habitante di Weg Rooi Hundo a reporta na autoridad cu nan a topa cu un hende sin bida den cas, na yegada di Polis a topa cu un señora di 84 aña sin bida.
Debi n’e situacion a pidi presencia di recherche y departamento tecnico. ‘E’ señora tabatin algun dia caba morto y un adicto ambulante tabata cuide.” Aki ta trata di hayazgo di e curpa di Juffrouw Raquel Emanuel, un Juffrouw di Ingles y musica (cu hoofdakte); Un maestra Ehemplar di Filomena College na Sanicolas di e añanan 60. Ademas di tabata Maestra, Juffrouw Raquel tabata e prome dama na Aruba, ku brevet pa piloto y tabata bula avion chikito e tempo ey na e aeropuerto de Vuist na Sanicolas. Ademas di tabata Maestra y piloto Juffrouw Raquel tabata un Educador, un Mama in dolor pa hopi di su ex-alumnonan, un fiel Parokiano di Misa Santa Teresita y un persona, cu semper a para pa Norma,
Balornan y Respet pa Prohimo cu énfasis riba RESPET pa Nos Grandinan. Esakinan tabata lesnan di bida cu juffrouw Raquel a hereda y lanta aden di Su defunto Mayornan. Juffrouw Raquel, tabata unico jiu. Después cu Su defunto Tata a fayece Juffrouw Raquel, tabata ainda mas inseparabel di su Sra. Mama. Y ora e momento yega pa cuida pa su mama den edadnan hopi halto mes, Juffrouw Raquel a haci esaki cu un Pasion y Dedicacion Excepcional, te na ultimo. Tur esaki den e cas ey mes na Weg Rooi Hundo.
Hunto cu un Verpleger di renombre Diploma, cu conocemento amplio di enfermeria Juffrouw Raquel a percura cu su Sra. Mama tabata BON cuida y ricibi e miho cuido cu por. Tristo ta cu Awe cu lo mester tabata turno di Juffrouw Raquel, pa por ricibi un Cuido Digno cu Pasion y Dedicacion, na mes manera, cu e a percura pa su Defunto Mayornan cu Respet y Dignidad; Siman pasa Juffrouw Raquel mester a hala su ultimo Rosea den abandono, den un Isolacion Forsa, un ambiente a-hygienico y sin un man pa tene, den su ansia di morto.
Hopi ta esnan cu a tuma nota di e noticia di e hayazgo di e curpa sin bida, a puntra: “Pero si Juffrouw Raquel tabatin un cuidador, cu e tabata paga: Con por ta cu e curpa tabata den cas pa tres día y ya a cuminsa decomposita? Unda e Cuidador aki tabata durante e ultimo oranan/dianan prome cu Juffrouw Raquel a hala su ultimo Rosea y den Ansia di morto? Otro pregunta cu a surgi tabata: Con bini cu e adicto ambulante aki-desde 2018 tabata “Run the Show” y NO tabata permiti bishita ni di un enfermera pa cuida heridanan di su pia, no tabata permiti bishita di famia, bisinja, ni di Misa? Y tabata core cu tur cu bini na porta pa Juffrouw Raquel? Con bini ora cu a notifica autoridad, cu tin algo cu NO ta normal ta tumando luga, ta wordo contesta cu tur cos ta “BON” eyden y cu No mester PREOCUPA??; Siendo cu tabata conoci cu aki ta trata di un Adicto Ambulante (cu nomber y Fam, conocí tambe pa e mesun autoridadnan ey) ?? Asina tin hopi pero hopi mas pregunta tambe di famia, su ex-alumnonan y comunidad, cu ainda a keda SIN contesta. Ta obvio cu e preocupacion y preguntanan existente y otronan, mester wordo adresa, pa por tin un cierre pa e famia y conocirnan cu a keda atras y cu ta pidi pa Husticia prevalece pa juffrouw Raquel. Esaki ta di suma importancia y na su luga pa por tin un despedida y entiero Digno di un Ser humano tan stima, un Adulto Mayor di Taya, y Educador. Juffrouw Raquel merece esaki y Mas.
Na luna di Juni Durante di e di 13 aña di Siman di conscientisacion “Bisa NO na Abuso di Adulto Mayor”, Fundacion Alzheimer Aruba, den e 2 Seminarionan “Cu e lema NO EXCUSE for ELDER ABUSE” a bolbe repasa e diferente forma di Abuso di Adulto Mayor (incluso esnan vulnerabel y dependiente di cuido) y con anda cu esakinan. Esakinan ta lo siguiente: Abuso Físico, Abuso Psicologico of Emocional, Abuso Sexual, Abuso Financiero y Negligencia/Abandono. Si repasa e lista di posibel Abusonan akiriba y analisa e preocupacion nan y preguntanan existente di famia, conocirnan, bisiñanan, su ex alumnonan y comunidad, tin por lo menos 3 abuso cu a tuma luga den e caso lamentabel aki y cu mester wordo investiga cu urgencia. Pasobra na Aruba No tin luga pa Abuso di Adulto Mayor; Tampoco Aruba no mag cay den gara di e Epidemia Creciente Mundialmente di Abuso di Adulto Mayor ( incluso esnan vulnerabel) nos grandinan, incluso esnan vulnerabel.
Awor mas cu nunca e proximo 2 lema nan di accion pa Aruba Lo keda resona:
- Lets Refuse Elder Abuse/ Ban Rechasa Abuso di Adulto Mayor!
- “No excuse for Elder Abuse / No tin excuus pa Abuso di Anciano.
Ta te ora husticia prevalece pa Juffrouw Raquel, Nos por ta sigur cu PORFIN Su alma por ta libera di tur dolor y sufrimento y cu unda e ta awo Juffrouw Raquel ta Bon Cuida! Cu Juffrouw Raquel su Alma Sosega na Paz den Brasa di Señor.
Skirbi pa: grupo di accion “Bisa No na Abuso di Adulto Mayor”
