ORANJESTAD (AAN): Actriz Amber Heard a difama su ex casa, e actor Johnny Depp,
presentando su mes como un victima di violencia domestico y awo mester paga su ex un indemnizacion di 15 miyon di dollar, hurando a conclui.
E hurado di siete miembro a considera cu Heard a difama Depp den un articulo publica den The Washington Post na 2018, na unda el a describi su mes como un “figura publico cu ta representa abuso domestico”.
Di otro banda, e hurado a determina cu Depp a difama Heard y mester paga 2 miyon di dollar.
Den e prome sentencia, e actriz a asegura “papia contra violencia sexual”, den di dos el a alega cu e ta “representa abuso domestico y sufri e rabia contra muhernan cu ta papia”, mientras cu den e di tres el a alega cu “institucionnan ta protege hende homber acusa di abuso”.
E hurado, cu a tarda mas di tres dia den deliberacion, a considera cu e tres alegacion tabata falso y a wordo skirbi cu e meta di difama e famoso actor, apesar cu e columna no a menciona Depp den ningun momento.
Heard a bisa cu e ta decepciona “mas aya di palabranan” y ta considera e veredicto como un “golpi” pa hende muher. “E decepcion cu mi ta sinti awe ta mas aya di palabranan. Mi ta desconsola pasobra e sero di evidencia no tabata suficiente pa enfrenta e poder y influencia desproporciona di mi ex casa”, el a bisa.
Depp a celebra e resultado di e veredicto y a asegura cu esaki a 'debolbe su bida'. “E hurado a debolbe mi bida. Mi ta sinti berdaderamente honra”, Depp a bisa den un comunicado. “Desde comienso, e meta di e caso tabata pa mustra e berdad, independientemente di e resultado”, el a agrega.
Depp a bisa cu nunca el a yega di lanta man contra Heard y cu en realidad, e muher tabata e abusador.
