DEN HAAG: Douane Hulandes e aña aki a sa di confisca un cantidad record di cocaina.
Di Januari te cu 25 di December, na Hulanda a logra di pone man riba 68.000 kilo di cocaina. Compara cu henter 2020 cu a captura 49.000 kilo, pues por mira cu 2021 a yega un plafond nunca antes.
E aña aki nan a logra di intercepta cargamentonan gigantesco di miles di kilo, e.o. uno di nan cu a yega na September for di Suriname. Esey tabatin 4.022 kilo di cocaina scondi den un container cu a yega for di Suriname y cu tabata yena cu palo di construccion. E container tabata destina pa un compania na Polonia.
Mayoria di e droga e aña aki a wordo haya scondi mey-mey di containernan cu a drenta Waf di Rotterdam.
Ta notable cu tambe a haya hopi cocaina mey-mey di cargamentonan cu a drenta via aeropuerto di Schiphol. Esaki a subi for di 700 kilo den 2020, pa 1.800 kilo den e aña aki.
Tambe en total a haya 500 kilo di cocaina den maletanan di pasaheronan cu a yega na Schiphol.
