GREENPEACE di acuerdo y ta apoya Plan
ORANJESTAD (AAN): Gobierno Hulandes kier expande significativamente e produccion di energia di biento riba lama cu mas molina di biento. E plan ta pa agrega 10,7 gigawatt di energia te cu aña 2030, cu ta mas cu e dobel cu a wordo anuncia.
Cas y Industria
E expansion cu ta wordo planea lo ta entre 750 y 800 molina di biento adicional y tin como meta; produci mas electricidad limpi y renobabel y pa uza esaki pa cas y tambe Industria. Ta bay bin tres Parke di Molina nobo na e parti Noord Oost di Noord - Holland y panord di Waddeneilanden. Ya tin parkenan di molina marino na IJmuiden y Egmond dilanti di e costa di Zeeland.
Den e acuerdo di coalicion ya a establece cu e gobierno kier haci un mayor uzo di e energia di molinanan di biento riba lama y otro 'fuentenan di energia renovabel/duradero'.
E Parkenan di Molina di biento mester contribui cu esaki y lo ta bay ta e mayor fuente di electricidad di biento pa aña 2030. "E parkenan di molina di biento den e lama di Noordzee tin menos impacto cu e turbinanan di biento riba tera, pero tambe nan mester ta bon instala den e lama di Noordzee", asina minister Jetten a laga sa.
Fondo di Clima
Gobierno di Hulanda kier paga un parti di e gastonan for di e “Fondo di Clima” cu tin un total di 35 miljard di Euro reserva. Gabinete Rutte ta asignando casi 1.7 miljard di Euro for di e fondo aki, pa e parkenan di molina di biento. Esaki no ta afecta e gastonan di construccion di e propio parkenan di molina di biento (cu ta core riba e gastonan di e empresa y inversionistanan).
Tambe tin intencion pa inverti den e instalacion di e conexion di coriente riba tera, cual ta sigura navegacion/transporte maritimo, tambe adaptacion pa pesca y pa “proteha e ecosistema”.
E tres areanan nobo ta ; Nederwiek, Lagelander y Doordewind.
Aunke ya pa algun tempo caba Gobierno Hulandes tin e intencion di expande cu un par di parke di molina di biento mas, e crisis actual di energía obviamente a acelera e proceso di tuma e desicionnan cu mes mester wordo tuma.
Minister Jetten a papia di un “Mijlpaal” den e transision pa energia mas sostenibel/duradero/renobabel.
Faiza Oulahsen, director di Clima y Energia di GREENPEACE, ta aplaudi e plan di Gobierno Hulandes. "Nos mester haci un compromiso fuerte cu e energia di biento pa logra e obhetivonan climatico y cambia por completo pa energia sostenibel mas lihe cu ta posibel.
Liber di e gas di Rusia y Groningen. E bida marino ta sufri principalmente debi na e transporte maritimo, piscamento di mas, y e cambio di clima. Loke tin mester awor ta mas proteccion di naturaleza, refuerzo di gobierno den esaki y piscamento menos dañino".
