Turismo na Aruba no mester di mas shock turbulencia mundial
- Merca ta man na cabez cu e realidad inhumano di Nicolas
- Hulanda ta na guera cu Rusia y no por causa invasion Aruba
ORANJESTAD(AAN)- Cu Statuut ta duna Reino Hulandes e responsabilidad riba relacionnan cu otro pais na mundo, ta algo cu ta mara na e posicion estatal di Aruba como pais den Reino Hulandes.
Por cierto e areglo cu Reino ta atende cu relacionnan cu exterior, ta algo aceptabel si tene na consideracion kico e pakete di Relacionnan cu Exterior ta encera pa tanto e paisnan como e Ciudadano Hulandes na cualkier parti di e reino.
Ora papia di Reino Hulandes, ta papia di un entidad estatal, cu tin un Conseho di Ministro cu ta forma dor di gobernantenan Hulandes y un representante di e Gobierno eligi na otro paisnan den Reino, manera Aruba.
E gobernantenan Hulandes, cu ta actua na nomber di e Pueblo di Aruba como ciudadano di Reino Hulandes, tin e deber sagrado di defende e bienestar di e Arubiano y e integridad nacional di Aruba como parti di Reino.
Un punto cu sigur ta bini dilanti ta, cu Reino Hulandes conoce un Gobierno di Reino, pero no conoce un Parlamento di Reino.
E representacion directo di votador di henter Pueblo Hulandes, pues Pueblo di Reino Hulandes, pa hopi hende, no ta honra e concepto democratico mas profundo cu ta mara na democracia.
E berdad mester wordo papia pa atende cu e situacion actual, cu ta indica con Hulanda ta hiba combersacion cu Venezuela, cu tin un porta cera cu Aruba despues cu Nicolas Maduro a dicidi cu e ta cera frontera entre e dos paisnan.
Ta uno di e poco, si no ta unico decision di Nicolas Maduro cu nos ta aplaudi pasobra esaki a evita cu cierto tentaculo a alcansa Aruba tambe den un situacion dictatorial Comunista na Venezuela.
Un decision cu tambe ta evita cu awe e aliadonan di Putin cu ta reuni y ta forma un parti importante di habitantenan di Venezuela nobo bou e mando Comunista di Nicolas Maduro, por trapa riba suela di Aruba oficialmente.
Na e momentonan aki, Venezuela ta sostene Putin y ta sostene e paisnan cu ta yuda Putin destrui bida inocente na Ukraine den un confrontacion cu por resulta den un Guera Mundial.
E ultimo dianan, cu prueba DIARIO a mustra con aliadonan di Putin, cu ta entrega Putin armanan pa mata ciudadanonan di Ukraine, ta e forsa economico y social di Venezuela, cu nan ta habita mientras Venezolanonan mes ta huy di nan pais.
Aruba den e situacion actual, pa defende bienestar di e nacion y di e Pueblo di Aruba, hamas por habri porta pa Nicolas Maduro.
Hulanda no por bay contra e bienestar di e Arubiano y mester respeta e pensamento general y sigur e bienestar di e Arubiano, manera Statuut ta exigi y no por papia di apertura di frontera cu e Gobierno di Nicolas Maduro, cu a comberti Venezuela den partner directo di Putin.
Habri porta pa Nicolas Maduro, cu a menasa cu Aruba ta di Venezuela, ta nifica habri porta pa Putin.
Di kico Gobierno Hulandes cu ta parti di NATO y Union Europeo, cu ta enemigo di Putin, ta papia cu Nicolas Maduro ora reuni riba e posibel apertura di frontera entre Venezuela y Aruba?
