Analisis di e comprension Hulandes pa yudansa financiero
*Con “forsa propio” lo reemplasa “asistencia” den Statuut?
*Secretario di Estado van Huffelen y e mulina di biento kibra
ORANJESTAD(AAN)—E siman aki Aruba por spera bishita atrobe di Secretario di Estado di Hulanda, encarga cu relacionnan den Reino.
E no ta bini pa papia realmente di placa, pero por spera cu na un forma of otro, e palabra “placa” lo por bini dilanti pasobra Reino ta den un situacion dificil.
Na Aruba e ta planea di bishita “Archivo Nacional Aruba” pero no ta conoci, cu ciertonan documentonan cu ta papia di autonomia di Aruba, lo habri caminda pa discuti algo mas serio.
Te cu recientemente, ora papia di problema cu placa den Reino, tabata papia di problema di e islanan Hulandes den Caribe.
Raymond Knops, e representante Hulandes cu a dicidi di splica e islanan cu nan mester a declara nan mes bancarota basta tempo pasa, a entrega su encargo na Alexandra van Huffelen, cu sigur ta comparti algo sumamente special cu Pueblo di Aruba, cu ta su amor pa e modelonan mas bunita cu mundo di moda tin pa ofrece.
Alexandra van Huffelen tabata un aire fresco pa Aruba, pero con suave e brisa lo keda mester bini dilanti awor cu Hulanda mes ta problema financiero.
Ya Covid-19 a mishi cu planificacion Hulandes na 2020, pero loke guera a haci cu Hulanda, ta pio cu e pais por a pensa.
Publicamente Gobierno Rutte mester a mustra Pueblo Hulandes cu awor mester busca no Miyones, pero Biyones, pa por enfrenta e problemanan financiero y social cu e Guera di Ukraine a crea pa e pais.
Den e relato cu Gobierno Hulandes a manda pa Parlamento, Tweede Kamer, Hulandes, ta mal noticia a wordo presenta.
E asina yama “Najaarsnota” cu ta wordo presenta na fin di 2022, ta indica con Gobierno Hulandes ta na careda pa cubri e gastonan di asistencia cu e ta duna e Pueblo pa entre otro gastonan di coriente.
E situacion ta asina serio, cu a dicidi pa stop proyectonan cu ya tin problema pa motibo di falta di personal. Asina por economia 2.7 , cu lo no ta nada pa yena e buraco habri den cifranan Hulandes.
Kico e situacion aki lo nifica pa Aruba? Kico e lo exigi di politiconan Hulandes cu mester di voto di e Pueblo Hulandes?
E relacionnan den Reino ta basa riba Statuut cu ta papia di “Steunend op eigen kracht, doch met de wil elkander bij te staan”.
Cu otro palabra, tur parti di Reino ta riba nan propio pia pa loke ta trata asuntonan financiero, pero tin e boluntad pa duna otro asistencia.
Awor cu e molina Hulandes cu ta produci asistencia financiero den Reino tambe na entre otro Aruba, a basha abou, kico lo pasa?
Aruba lo mester prepara su mes pa un epoca, cu politiconan na Den Haag lo bisa cu tempo a cambia.
E exigencianan di Hulanda pa reforma financiero sigur lo por bira mas pisa den e situacion Hulandes cu te awor tabata basa riba “boluntad pa brinda asistencia” pero cu situacion por cambia.
E Hulandes ta exigi asistencia pa e por sigui come y pa e por sigui biba. Panaderonan y horticultornan ta wordo subsidia dor di Hulanda. Awor si placa bira menos, kico lo pasa?
2023 por nifica cu Hulanda ta bay presta mas atencion na e reforma di Aruba, awor cu mulina di biento di Hulanda a basha abou den e tormenta di Guera di Ukraine, problemanan serio den salida di petroleo, cambio di clima y tur loke tin mundo na careda y por crea mas exigencia pa e realidad di e palabra “autonomia” na Aruba.
