Knops sorprendi cu diripiente Aruba no kier corta 12,6% salario mas
DEN HAAG: Pa awor, ni Aruba, Curacao y St. Maarten lo no ricibi mas sosten di liquidez, y e islanan lo no wordo permiti pa desvia di e norma di presupuesto balanza, tanten cu e pais no a duna nan compromiso politico na e Consenso di Rijkswet pa establece e entidad Caribense pa Reforma y Desaroyo (COHO).
Conseho di Ministronan di Reino a pospone riba Diabierna e decision encuanto aprobacion di un solicitud di Aruba pa 80 miyon Florin den sosten di liquidez pa e prome trimester di 2022, te na e siguiente reunion di Conseho di Ministronan di Reino na Januari 2022. Curacao y St. Maarten no a pidi sosten di liquidez den e prome semester di 2022.
Ademas di esey, Conseho di Ministronan di Reino a pospone tambe e decision riba e peticion di e islanan Caribense, pa por sigui desvia di e norma di presupuesto balanza prescribi den e Rijkswet Financieel Toezicht (RFT). Esaki ta afecta tur tres pais cu lo bay tin sigur deficitnan grandi di presupuesto otro aña debi na e pandemia di Covid-19.
Conseho di Ministronan di Reino a dicidi na pospone e tumamento di decision, debi cu e islanan den Caribe no a cumpli cu e condicionnan, y pasobra no tabatin compromiso politico pa un acuerdo cu a ser logra na e nivel di funcionarionan entre Hulanda y Caribe Hulandes na comienzo di December. Esey ta loke Secretario di Estado Hulandes, Raymond Knops, a bisa na final di e reunion di Diabierna.
“Esey ta e motibo pakico nos no por sigui cu e trayectoria di legislacion,” Knops a bisa. Aki e ta referi e legislacion pa haci COHO bira oficial.
“Pesey nos no por sigui cu e protocol di supervision financiero pa Aruba, y nos no por sigui haci loke nos tabata kier a haci, esta pa duna sosten di liquidez.”
“Tanten cu no tin claridad, nos no por move bay dilanti.” El a bisa tambe cu e ta haya hopi straño cu despues di a yega na un acuerdo na nivel di funcionarionan, Gobiernonan ta bin bisa “no, y nos kier haci algo otro”.
“Esaki ta parce cu nos kier bay bek den tempo, y esey no ta algo cu nos kier. Nos kier move padilanti. Parlamentonan ta wardando pa e documentonan pa asina cuminza cu e tratamento di e Consensus Rijkswet pa establece COHO. Esaki ta cuminza tarda demasiado. Cosnan ta moviendo demasiado poco-poco,” Knops a bisa.
Den opinion di Raymond Knops, no tin ningun base legal tanten cu no tin e Consensus Rijkswet.
No corta salario mas pero si pidi sosten: “Hulanda a presta e islanan den Caribe casi 1 biyon Euro, cu ta casi 2 biyon Florin. Esey ta hopi placa y e mester wordo bon garantiza legalmente. Mi ta preocupa cu e progreso. Nos a bin ta papiando di esaki pa 1½ aña caba. Nos tabatin un acuerdo na comienzo di December y mi tabata dispuesto pa firm’e. E medidanan indica den e Landspakket no ta djis carta di papel, di berdad nan mester wordo ehecuta”.
Raymond Knops a reacciona tambe riba e carta cu Prome Ministro Wever-Croes a manda pa pidi permiso di Hulanda pa elimina e reduccion di 12,6% di salario di empleadonan di sector publico y semipublico, siendo cu Aruba no kier compromete politicamente na e medidanan di Landspakket, mientras cu e pais ainda ta depende y ta pidiendo pa sosten di liquidez.
Knops a defende e decision di Conseho di Ministronan di Reino di no duna permiso na e paisnan Caribense pa awor, pa tin un deficit di presupuesto pa otro aña. “Nos no por permiti cu e paisnan di Caribe Hulandes ta bolbe hinca nan mes den debe, mientras cu nan o ta cumpli cu e acuerdonan.”
Diripiente Aruba no kier corta salario mas? Secretario di Estado a desmenti acusacionnan di e islanan den Caribe, cu Hulanda ta cambiando e condicionnan di forma unilateral. “Nos no ta moviendo e palonan di goal. Nos djis kier pa e paisnan atene nan mes na e acuerdonan cu nos a haci anteriormente. Mi ta pensa cu nos por pidi esey. Mi ta compronde cu e medidanan cu e islanan tin di tuma ta doloroso, pero nos a bay di acuerdo riba eseynan. Ta inhusto pa bisa awor: Ya nos a aplica e reduccion di salario durante un tempo, pues awor nos no mester hacie mas.”
Knops a bisa cu e ta spera cu pronto nan lo yega na un solucion, pa asina duna un perspectiva na e islanan y su hendenan.
“Esey ta e motibo pakico nos ta haci esaki. Esaki no ta un wega, ni un discusion entre politiconan. Ta djis un forma pa purba mehora tur cos, pa bay dilanti hunto. Nos kier inverti den educacion na Curacao, den e sector di Husticia na St. Maarten, sigura tiponan di interes mas abao pa e prestamonan di Aruba. Semper nos mester pensa riba e personanan cu ta pasando den duro, pasobra nan lo beneficia ora nos haci cosnan bon. Esey ta nos meta principal, y esey ta loke ta uniendo nos den Reino Hulandes.”
