Analisis di e splicacion cu Gobierno Rutte mester duna Pueblo Hulandes
*E problema di e ciudadano Hulandes cu ta doño di rikeza enorme
*E fortuna di Noordzee a alcansa e Hulandes cu no tin cas pa biba aden?
ORANJESTAD(AAN)—Kico ta e problema entre Aruba y Hulanda? Aruba a cumpli cu loke Hulanda a exigi, cu ta e maneho financiero cu ta honra e contenido di Statuut, di un autonomia cu ta sirbi e bienestar di tur Arubiano.
For di momento cu Gabinete Mark Rutte a bay cas, a base na prome lugar di decision interno di e partido di Mark Rutte, mes, DIARIO a mustra cu nunca e Gobierno cu a dirigi Hulanda for di ultimo eleccion, mester a mira luz.
E bom a rementa pa diferente asunto cu no tin ningun relacion cu Aruba y talbez ni sikiera cu e migrantenan, cu VVD awor dirigi pa un lider cu a yega Hulanda como migrante, kier haci hende kere.
Pa ta hopi sincero, nos ta relata aki directamente na e interes cu nos a splica semper cu Aruba mester tin pa loke ta pasa na Hulanda, caminda decisionnan ta wordo tuma pa Aruba, cu no ta na haltura di asuntonan importante di Hulanda.
For di prome momento nos a mustra cu si Gobierno Rutte a bati retirada, ta pasobra e no por enfrenta Pueblo Hulandes, cu ta sufri di situacionnan increibel di un pais manera Hulanda, cu ta uno di e paisnan mas rico na mundo.
Con por ta cu tin falta di vivienda na Hulanda cu kier coregi Aruba? Con por ta cu Hulanda no a regla su poblacion por ehempel?
Pa por atende cu Hulanda mester conoce e Hulandes autentico, cu sigur no ta e lider nobo di VVD, cu ta un migrante cu awor ta usa e problema di migrante pa e haya voto.
Kico ta pasa cu e Hulandes cu ta biba den campo? Kico ta pasa cu e “boer” cu ta voto pero no ta mira su dolor haya expresion?
Esaki ta loke ta haci partidonan BBB y Omzigt grandi y causante di un revolucion politico.
Na un momento importante pa Aruba, partidonan cu a faya cu e Pueblo Hulandes, ta bin causa mas problema na Aruba cu awor por tuma nota cu e RAft lo no wordo atende despues di eleccion, pero lo sigui wordo atende pa medio di Secretario di Estado saliente, Alexandra van Huffelen.
Nos kier pone e asunto aki un banda pa presenta loke pa nos ta importante. Pakico tin tanto problema na Hulanda cu ta un exportador di petroleo y ta parti di un proyecto historico cu ta e proyecto di Noordzee, cu a entrega Hulanda un fortuna como pais productor di petroleo!
Cu e analisis aki nos ta trata na analisa pakico no tin mas atencion pa e papel di Hulanda como productor di petroleo y e loke Noordzee lo bira como centro di energia limpki pero tambe santana di restonan di e residuo.
Pakico awe partidonan nobo ta papia di un diferencia entre e realidad di e centro politico Den Haag y e Hulandes den su cas cu no tin vivienda, no tin seguridad como anciano, no por conta cu maestronan suficiente y bon planificacion pa personal den tur su ramonan?
Hulanda ta uno di e paisnan Europeo mas importante di exportacion y hasta ta exporta petroleo.
Awe Rutte mestr splica kico ta e problema cu a haci cu partidonan nobo di e pais, tin exito y ta causa revolucion.
Aruba no ta e problema di Hulanda, cu no mester uza e loke a pasa Aruba pasobra Hulanda a permiti Mike Eman haci y deshaci manera e tabata kier cu Aruba.
Nos bista ta keda dirigi riba uno di e proyectonan mas grandi di Europa cu ta Noordzee, cu mas cu un laman ta bira centro di produccion di energia den e futuro cu ta despedi di azeta, cu te awe ta produci sumanan enorme pa Hulanda y otro paisnan Europeo productor y exportador di petroleo.
