Na Augustus 1977 forsa politico di Antia a rechasa Status Aparte
*Aruba a lucha pa ta un estado di derecho segun regla basico
*Reino mester reforsa respet pa Colegionan mas halto di Estado
ORANJESTAD (AAN) — Na Augustus 1977, historia politico di Antia Hulandes a conoce uno di su momentonan determinante, cu a entrega prueba con ley por permiti pa democracia wordo interumpi.
Si den historia di e lucha pa Status Aparte tabata tin un momento cu a duna Pueblo di Aruba razon pa exigi su status nobo den Reino, tabata na 1977 ora eleccionnan pa Parlamento di Antia a confirma cu Aruba tabata kier su Status Aparte bou liderazgo di Betico Croes.
Un Gobierno nobo mester a wordo forma pa Antia Hulandes a base di e reparticion di asiento den Parlamento di Antia Hulandes cu votadornan di cada isla a dicidi.
Esaki tabata nifica cu cada isla tabata tin un cantidad di representante den Reino a base di e areglo di 12-8 cu un dia a silencia e lucha di Aruba pa autonomia pero a haya bida nobo ora Betico Croes a introduci Status Aparte.
A base di e reparticion di voto den Parlamento Antiano, tabata e lider di Partido Democratico di Curacao cu a bira formador di e Gobierno Antiano na 1977 cu un victoria cu a kibra record historico na Curacao.
Eleccion na Aruba a proclama Betico Croes como e lider indiscutibel di Aruba, pero el a keda for di Gobierno pasobra e tabata lucha pa Status Aparte, cu tabata contra e pensamento di Federacion Antiano, cu e cadena di partidonan Democratico na otro islanan tabata favorece.
Betico Croes a keda for di e Gobierno Antiano nobo pa motibo di Status Aparte y no e interpretacion democratico cu eleccion ta encera.
E suceso a duna mas forsa na e exigencia pa Status Aparte di Aruba, pero awe ta drenta Augustus 2023 cu un exigencia inaceptabel di Reino Hulandes pa Aruba acepta e supervision total di Hulanda riba su maneho financiero, cu ta regla den e loke ta wordo yama “Staatsinrichting”, e forma cu gobernacion ta regla segun ley.
Ora sigui e Staatsregeling di Aruba, ta topa cu e forma cu e cuadro di ley di e pais cu un gobernacion cu ta basa riba e forma cu ley ta describi.
Como derecho basico Aruba tin un Gobierno, cu ta wordo nombra pa medio di eleccion indirecto dor di Parlamento cu mester supervisa gobernacion a base di e cuadro di Ley cu sosten di e dos otro organonan mas halto di estado cu ta Raad van Advies y Algemene Rekenkamer Aruba, cu ta independiente di politica y gobernacion.
Naturalmente tin e otro parti di Trias Politica, cu ta Husticia.
Pa keda al caso, ademas di e Colegionan Halto di Estado, tin tambe e Conseho Social Economico y e representante di Aruba den Raad van State di Hulanda.
DIARIO semper ta busca opinion di e colegionan halto di Estado den su rapportnan cu ta keda presenta na Aruba, cu asina por opina tambe si algo ta di acuerdo cu e ramo legal di Aruba of no.
Hulanda awor mester splica na un forma cla na Pueblo di Aruba kico ta pasa cu e base legal pa gobernacion di Aruba na momento cu Hulanda introduci un sistema di supervision pa Aruba, cu ta deshaci di e autonomia di e pais.
Uno di e clausulanan importante den e relacionnan den Reino sigur si tene na consideracion kico a pasa cu hopi isla chikito, ta e hecho cu Reino por interveni si e bienestar di e Pueblo y di e pais ta na peligro pa motibo di maneho di gobernantenan y falta di accion di Parlamento di e pais.
Uno di e problemanan importante cu den rutina politico manera DIARIO a adverti ta bini dilanti, ta e forma cu Parlamento di Aruba ta neglisha e advertencianan y asistencia di e Colegionan mas Halto di Estado, manera a pasa por ehempel cu e wega politico di 2009 pa scrap BBO.
Pero con Gobierno di Reino mes a actua? Kico a pasa ora Gobierno di Reino a wordo puntra publicamente kico e ta pensa di e Acuerdo di Citgo y politiconan di Reino a bisa cu Aruba ta autonomo?
Awe Reino no tin motibo pa deshaci na e forma total cu e kier pa medio di supervision, di e autonomia di Aruba pasobra Gobierno di Aruba a duna prueba cu el a tuma e medidanan cu e mester a tuma.
Sinembargo, loke Reino mester haci ta, exigi implementacionnan di reglanan cu ta sostene respet cu mester tin pa Algemene Rekenkamer Aruba y Raad van Advies y impone castigo pa politiconan cu ta kibra e Ley di Contabilidad cu ta regla con ta gasta plca di Pueblo y ta exigi loke a pasa na 2009.
Augustus a bati na porta.
Den pasado Augustus a entrega prueba cu ley por yuda crea situacionnan di inhusticia. Awe, Augstus ta exigi pa, aunke tin eleccion na Hulanda, no kibra democracia na Aruba pero reforsa democracia cu e armanan autentico di Ley cu ta salvaguardia bienestar di un Pueblo!
