Motibo original di Ministro Weerwind pa no pasa ley cambia
*Comercio den mucha y problemanan serio ora bira adulto
*Informacion anterior di DIARIO confirma den e decision
ORANJESTAD (AAN) — Kico ta e motibo cu Ministro Weerwind di Hulanda diripiente a cambia su reserva pa ehecuta e ley cu e tabata tin problema pa introduci anteriormente, no ta conoci.
Importante a bira e hecho cu ayera a wordo anuncia na Hulanda, cu no ta acepta pa ciudadanonan na Hulanda, adopta mucha for di exterior.
Manera DIARIO a mustra algun tempo pasa, Parlamento Hulandes a bay di acuerdo cu un peticion di e partido SP, pa pone un fin na e forma cu mayornan Hulandes, ta busca un yiu den exterior, cu nan ta adopta.
Den e mocion a pidi e Ministro pa na un forma ciudadoso pone un fin na e forma cu mucha cu nace como ciudadano di otro pais, ta wordo adopta dor di parehanan Hulandes.
Segun e decision di e Ministro awor, e peticionnan cu ya a wordo entrega, lo por wordo honra pero no ta acepta peticion nobo pa adopta mucha den exterior a base di problemanan serio cu ta wordo registra.
E topico pa basta tempo ta na discusion y na 2021 a conoce un final a base di un rapport, cu ta describi situacionnan hororoso cu ta presenta.
Despues cu a schrap cambio di muchanan stranhero den ciudadano Hulandes, Ministro Weerwind a introduci un excepcion pa permiti pa adopta mucha for di Filipinas, Hungria, Lesotho, Taiwan, Thailand, Sud Africa, Bulgaria y Portugal.
Awor e mes a revoca su decision y ta stop e proceso pa adopta mucha completamente a base di discusionnan cu a continua y cu a duna prueba di e dolor grandi di muchanan cu mester ricibi proteccion oficial.
Rapportnan a mustra na Hulanda con e mucha ta crece mas feliz den su propio ambiente cerca su mayornan natural. Importante tabata e hecho cu adopta mucha a bira tambe un negoshi den cual hopi placa ta circula, sigur si ta trata di muchanan cu segun nan mayornan nobo, ta mas feliz cu mas placa y bienestar material.
Rapportnan ta indica kico ta pasa cu muchanan ora nan cuminsa crece den ambiente pa cual nan mayornan adoptivo ta escoge y den cual nan mester madura, sin cu nan tin opcion pa dicidi si nan ta di acuerdo cu e forma di bida, na hopi ocasion contra nan pensamento personal.
Mientras na Hulanda, Ministro Weerwind mes no a splica pakico awor el a cambia di opinion, DIARIO a acerca informantenan cu ta indica, cu adopta mucha sigur ta un topico cu mester di discusion actualmente ya cu cambionan local y internacional, ta influencia e felicidad y bienestar di un mucha, cu sigur no ta solamente financiero.
E mucha mester ta feliz y como mucha no por wordo somete na boluntad di personanan cu cual e no tin un base di comprension basa riba cultura y pensamento. E mucha ora e crece, den e mundo di comunicacion moderno, ta cuminsa trata na busca su origen sigur si basicemente e por sinti e sentimento of bay di acuerdo cu e forma di bida di personanan cu a bira su mayor legal pa medio di e proceso pa adapta mucha.
Ora un mucha wordo adopta na su propio pais, su oportunidad pa busca su raiz ora e bira adulto, ta mas grandi cu ora su mayornan original no ta conoci.
Informantenan ta mustra riba e cantidad di storianan di hobennan cu na momento cu Ley ta permiti, ta cuminsa indaga den nan pasado pa busca nan mayor original pero tambe ta bandona e sistema di educacion y normanan cu el a ricibi di su mayornan cu a adopta su persona como mucha.
E cantidad di mucha adopta cu ta paga profesionalnan pa yuda nan busca nan mayornan original ta crece y den esaki sigur e lazonan humano ta conta mucho mas cu si nan a wordo stroba di biba den nan ambiente di nacemento cu su moral y su tradicionnan.
Ora ta trata di mayornan adoptivo na nan propio lugar di nacemento, muchanan tin mas oportunidad pa expresa nan mes pero tambe pa drenta den contacto cu nan mayornan real y dicidi kico ta nan preferencia ora nan bira adulto.
Sigur den e generacionnan nobo, negoshi den mucha adopta, a bira un realidad, cu a causa dolor na hopi mucha cu tin problema cu nan propio identidad, cu nan ta busca ora nan bira mayor di edad.
No ta papia aki mes di mucha cu ta bira victima di abuso y ta wordo obliga na silencia nan propio pensamentonan of ta wordo hasta uza pa nan mayornan adoptivo, tin bienestar material.
DIARIO lo sigui atende cu e topico aki cu den temponan moderno, sigur ta exigi estudio ya cu ora papia di mucha, ta papia di ser humano!
