Decision tuma riba e sosten di liquidez
ORANJESTAD (AAN): Informacion for di Den Haag ta indica cu Conseho di Ministro di Reino riba Diabierna a dicidi pa extende e terminonan na 18 luna pa pago bek di prestamo duna door di Gobierno Hulandes, cu a wordo duna na Aruba, Curaçao, y St. Maarten durante e pandemia di Covid-19.
E prestamonan cu Hulanda a duna a wordo haci como un sosten di liquidez, y tabatin un fecha final di 10 April 2022. Como cu no ta factible pa e islanan aki cuminza paga e prestamonan aki bek entrante siguiente luna, como cu e situacion economico financiero no a recupera suficiente ainda, e ora Gobierno di Reino a bay di acuerdo pa refinancia e prestamonan aki.
Den Haag a bisa cu e prestamonan individual lo wordo agrupa hunto y refinancia na un interes di 0%.
Awor Secretario Hulandes pa Asuntonan di Reino, Alexandra van Huffelen a mustra cu nan lo sigui consulta cu e islanan pa mira kico lo haci cu e pago bek di e prestamonan aki riba termino largo.
En total pa e islanan aki, ta trata di un prestamo di mas di 1 biyon Euro, di cual gran parti a bay pa Aruba (441.7 miyon Euro), Curaçao (448.2 miyon Euro), y St. Maarten (141.7 miyon Euro).
Gobierno nobo Hulandes via di Secretaria Van Huffelen a bisa tambe cu e islanan lo no ricibi sosten di liquidez pa e di dos cuartal di 2022. Den Haag ta haya cu esey no ta necesario, debi cu e economia di e tres islanan aki ta recuperando. Pero toch tin espacio pa discuti esaki si e proba di ta necesario den futuro.
Toch e proceso di aplica e condicionnan cu Aruba, Curaçao y St. Maarten tin di cumpli cune pa haya e sosten di liquidez, ta sigui. E asina yama Landspakketnan ta wordo implementa y Parlamentonan di e islanan ta ocupa cu e legislacion pa establece e cuerpo di COHO.
Tanto Aruba como Curaçao y St. Maarten a mustra di ta satisfecho cu e decision di Conseho di Ministro di Reino pa prolonga e pago bek di e prestamonan aki.
