ORANJESTAD (AAN): Diaranson mainta a circula e noticia den medionan internacional cu Corsow lo a habri bek e espacio aereo cu Venezuela.
Den oranan di atardi, sinembargo, e noticia aki a wordo desmenti door di Hulanda.
Segun Globovision, Hulanda (a indica cu no ta berdad cu ya caba e relacionnan entre Corsow y Venezuela a wordo restableci. Contrario na loke algun medio di comunicacion a señala, no ta existi un decision ainda riba e tema di e frontera cera entre Venezuela y e islanan di Aruba, Bonaire y Corsow, cu ta cay bao Reino Hulandes.
Hulanda a laga sa cu cualkier novedad no wordo emiti pa medio di e canalnan oficial.
Parce cu e noticia aki a circula pa motivo cu diamars, e director di turismo di Corsow na Venezuela, Marco Leal, a duna un entrevista na un medio local unda a expresa cu e gobierno di Hulanda a bisa si pa reactiva e vuelonan entre e islanan y cu solamente tabata tin mester di e aprobacion di Venezuela.
Manera ta conoci, e frontera entre e islanan ABC y Venezuela a wordo cera prome cu e pandemia pa motivonan relaciona cu e explosion migratorio door di e situacion na e pais bisiña. E frontera despues a permanece cera y durante y post-covid y te ainda, a pesar cu tin dialogo andando cu Venezuela, e decision no a wordo tuma oficialmente riba un reapertura.
Esaki sigur ta un tema cu ta pendiente riba e agenda di e gobiernonan di e paisnan concerni.
Pa mas di 200 anja, Venezuela y e islanan ABC a mantene un relacion di comercio hopi cercano. E islanan a depende di e comercio di entre otro fruta y berdad. E mercado turistico for di Venezuela tabata na prome lugar.
Awendia, e relacion comercial lo sigui ta primordial, pero mientrastanto lo keda vigila sigur e situacion social na e pais cual a ocasiona e casonan di emigracion den gran escala.
