MQ-9 Reaper ta funciona similar cu un avion
ORANJESTAD (AAN): Manera DIARIO a trece dilanti caba, dentro di poco Forza Aereo Real Hulandes lo tin un Drone super special cu lo ta bulando riba awanan teritorial di islanan ABC den Caribe, pa asina detecta tur cos inusual tanto den aire como tambe riba lama. E lo bay yuda grandemente tambe den detecta actividadnan di narcotrafico.
Diaranson 20 di April, Forza Aereo Real Hulandes a haci nan prome test cu e Drone cu ta ser yama MQ-9 Reaper, y e vuelo aki for di Aeropuerto di Hato na Curaçao tabata exitoso.
MQ-9 Reaper ta un Drone tipo RPAS (Remotely Piloted Aircraft System) cu ta wordo bula door di pilotonan for di un cockpit na tera. Esaki ta prome biaha cu un MQ-9 Hulandes a haci un vuelo di training.
Forza Aereo ta bay principalmente haci ehercicio y entrenamento pa asina conoce mas di cerca e Drone nobo aki, cu ta bay yuda colecta informacion for di halto.
DIARIO a compronde cu e MQ-9 Reaper ta cay bao di Commandement der Zeemacht pa Caribe Hulandes, y na su tempo lo bay wordo poni pa haci trabao tambe sosteniendo autoridadnan civil ora di buskeda y vigilancia. Aki lo bay traha parcialmente cu Merca, manera e.o. durante operacionnan Anti-Droga. E Drone aki ta wordo usa pa reconocimento so, y e no tin arma abordo.
Si e entrenamento y instruccionnan sigui den bon caminda, esey nifica cu e MQ-9 Reaper lo por wordo usa door di Forza Aereo Real Hulandes tambe na otro partinan di mundo.
