ORANJESTAD(AAN): Diahuebs atardi a tuma lugar un conferencia di prensa di Sindicato SIMAR,
unda cu presidente di e sindicato di maestro a duna un reaccion riba e veredicto cu nan a ricibi Diaranzon, despues cu Gobierno a entama un caso contra nan.
Albertus a splica cu Gobierno den su caso a pidi pa 3 cos.
Uno ta pa prohibi esnan cu ta traha den enseñanza y SIMAR mes di tene cualkier tipo di accion.
E gabinete a pidi huez pa obliga e sindicato di paga un multa di 250.000 florin si nan viola e prohibicion.
“E peticion aki di Gobierno a wordo rechaza pa huez, pues el a wordo bari for di mesa”.
Gobierno a pidi tambe pa informa esnan laborando den veld di enseñanza cu nan tin cu bay traha bek y esaki tambe a wordo rechaza pa huez, segun Albertus.
El a sigui bisa cu di tres exigencia, esta pa SIMAR paga e gastonan di e caso, tambe a wordo rechaza pa corte.
Segun e presidente di e sindicato, SIMAR tambe a bin cu su peticionnan den e caso aki.
Entre otro a pidi pa traha 1 ora menos pa dia, cu lo encera 30 minuut menos di les pa dia pa e alumnonan.
Esaki a wordo rechaza pa huez.
“Nos no a haya e OK pa haci esaki, pasobra segun huez e tabata un accion indefini y sin un fecha final”.
Huez a prohibi tambe e maestro di tene un accion colectivo, unda cu e maestro lo ta poniendo presion riba Gobierno pa unilateralmente elimina e recorte di 12.6%.
Esaki segun Albertus, kende a sigui bisa cu locual SIMAR kier aclarea si ta cu e veld di enseñanza por tene accion, pues no ta asina cu nan no por sali protesta contra e medida di 12.6.
“Nos por sali afo pa mustra nos malcontento, pasobra den e veredicto mes huez ta bisa cu e ta un derecho fundamental di cada ciudadano pa sali pafo y vocifera ora cu nan ta malcontento riba algo”.
Como cu SIMAR ta un sindicato y nos ta representa esnan cu ta laborando den veld di enseñanza, nos kier subraya y trece pa dilanti cu un bon dunador di trabao ta tene cuenta cu e bienestar, salud y seguridad di su trahadornan.
Nos por bisa cu actualmente e dunador di trabao di e veld di enseñanza ta fayando den esaki, pasobra e no ta tene cuenta cu e puntonan aki, segun Albertus.
El a sigui bisa cu como ehempel e ta trece dilanti cu na Mei di 2020 esnan laborando den enseñanza a wordo mal informa ora cu Gobierno unilateralmente a drenta den cartera di hende y a corta cu 12.6%.
Segun Albertus, actualmente ainda ta corta den e cartera di e clase trahador.
“Aña pasa na November di 2021 a sali na cla cu ora cu Gobierno a bin y a corta unilateralmente den salario bao di capa di solidarismo, e no tabata sincero cu e trahador den veld di enseñanza pasobra el a corta pa baha e gastonan di e aparato gubernamental (personeelskosten), pero 23 luna despues ainda ta sigui corta, segun e presidente di SIMAR.
El a sigui bisa cu pa colmo e luna aki Parlamento a aproba un presupuesto, unda cu Gobierno ta subi su gastonan di personal y ‘goederen en diensten’.
Esaki mientras ta sigui exigi 12.6% di e salario di e trahador den enseñanza.
