Teniendo cuenta cu e ta un Parlamentario y candidato pa Minister
- Tambe pa bis’e di kico ta wordo sospecha di dje
- Tur esaki a base di Hof Europeo di Derechonan Humano
ORANJESTAD (AAN): Diaranson mainta via email, Hues di Corte den Promer Instancia a manda sentencia pa e abogado mr. D. Croes y Duijneveld di Mike de Meza y Ministerio Publico.
Hues ta haya cu den e caso aki, Ministerio Publico mester informa Mike de Meza: 1, Si e ta un sospechoso, 2, Si e ta un sospechoso, di kico Mike de Meza ta wordo sospecha di dje.
Evaluacion di Hues: Hues den su evaluacion di e caso (Raadkamer) cu Mike de Meza a cuminsa contra Ministerio Publico, ta mustra cu e promer pregunta cu mester haya contesta ariba ta, si Mike de Meza ta wordo persigui penal. Hues ta mustra cu a base di Hof Europeo di Derechonan Humano (HERM), e instancia concerni no solamente mester informa esaki sino tambe mester demostra ki delito castigabel ta sospecha de Meza di dje.
Hues ta mustra cu si supone cu ta manera de Meza ta bisa, cu ta Procurador General a informa Promer Minister, esaki no kiermen cu tin un acusacion penal manera ta exigi den articulo 6 EVRM (Derechonan Humano).
Si ta manera de Meza ta bisa, e ora ey ta trata di informacion confidencial cu Procurador General a duna Promer Minister, cu ta specificamente pa e trabao di informa Formador, manera ta para den e ley cu ta evalua un candidato pa minister (LIM).
Na opinion di Hues, tipo di informacion asina, no ta dirigi riba persigui penal Mike de Meza. Aunke con grandi e consecuencianan di esaki por ta, no por interpreta e informacion asina tampoco. Esaki ta cuadra cu e punto di bista di Ministerio Publico den e caso aki, cu a bisa bon cla cu ainda no a tuma un decision si ta bay persigui Mike de Meza of no.
Hues ta mustra cu den e caso specifico aki, e ta haya cu e ta otro compara cu un hende normal. Aki ta trata di e situacion cu Mike de Meza ta un Parlamentario y candidato pa minister di e Gobierno nobo. Si tin sospecho, esaki lo por perhudica Mike de Meza pa cu su candidatura como minister.
Teniendo cuenta cu e situacion specifico aki, Hues ta bay di acuerdo cu e peticion di Mike de Meza, esta cu Ministerio Publico mester informa Mike de Meza si e ta un sospechoso y si ta asina, di kico e ta wordo sospecha di dje.
Decision di Hues: Hues ta ordena Ministerio Publico pa dentro di 14 dia, den un carta informa Mike de Meza si e ta un sospechoso den un investigacion, si of no. Si Ministerio Publico ta considera Mike de Meza sospechoso, Ministerio Publico mester informa di ki delito penal ta sospecha Mike de Meza.
