Director di Hospital, Jacco Vroegop:
- Algun compania ya a stop di duna credito na Hospital
ORANJESTAD (AAN): Director di Hospital, Jacco Vroegop, a expresa su preocupacion tocante e situacion financiero cu Hospital ta enfrentando actualmente. Den un entrevista cu DIARIO, Vroegop a indica cu, apesar cu e ta mantene un actitud optimista y ta kere cu ainda por yega na un solucion, e negociacionnan ta durando for di februari y e tempo pa actua ta bira cada biaha mas cortico.
Segun e director, Hospital a informa su empleadonan abiertamente tocante loke ta pasando. Pa medio di diferente townhall meetings, gerencia a splica e situacion, e motibonan tras dje y e posibel consecuencianan. Esaki ta permiti e empleadonan comprende e problema y tambe splic’e na nan pashent y famianan.
Vroegop a enfatisa cu e preocupacion no ta basa riba percepcion solamente. E staf medico, sindicato y Raad van Toezicht ta sostene e posicion di gerencia, pasobra nan ta mira y experimenta e problema den practica, mientras cu e cifranan tambe ta confirma cu tin un deficit real.
Si no haya un solucion pronto, Hospital por ta obliga pa reduci cuido regular y programa. Esaki ta inclui, por ehempel, operacion pa un rudia nobo, tratamento pa hernia y otro procedura cu no ta considera urgente. Pashentnan cu mester di e tipo di cuido aki lo por enfrenta un periodo di espera mas largo, posiblemente te den e siguiente aña.
Cuido urgente lo keda wordo brinda. Hospital lo sigui atende casonan manera accidente serio, cancer, dialisis, infarto y sangramento cerebral. Segun Vroegop, no ta humano ni conforme vision di Hospital pa laga e pashentnan aki warda si nan bida of salud ta na peliger.
E problema financiero ta wordo sinti caba den operacion diario. Algun proveedor ta wordo paga mas laat cu mester ta y, den practica, ta funcionando temporalmente manera un fuente di credito pa Hospital. Varios otro proveedor a expresa nan descontento y ta exigi pago mas lihe.
DIARIO a ricibi confirmacion cu varios compania priva a hasta “close” e account di Hospital y no ta dunando servicio mas, te ora cu nan tambe ricibi pago pa nan debe cu tabata acumulando.
P’esey, e situacion no ta un riesgo pa futuro solamente. Pashentnan ta nota caba cu ta dura mas largo pa haya un cita, pa wordo opera of wordo mira pa un specialista. Vroegop a indica cu idealmente mester haya un solucion prome cu fin di e luna aki. Si no yega na un acuerdo, Hospital lo por of mester interveni entre fin di september y principio di november, reduciendo ainda mas e cuido y aumentando e tempo di espera.
Apesar di e presion, Vroegop a expresa cu ta mantene speranza cu tur parti envolvi lo reconoce e urgencia y lo logra yega na un solucion pa evita cu e situacion ta afecta pashentnan ainda mas.
