E momento a yega pa stabilidad ta base di informacion na Pueblo --- *Situacion mundial actual ta exigi actitud realistico den cuido ---*Prijsnan pa cuido na hospital ta sigui subi den inflacion pisa
ORANJESTAD (AAN) — Hospital tabata uno di e temanan mas importante prome cu Aruba a cuminsa prepara su mes pa e dia festivo relaciona cu Dia di Rey.
Otro fin di siman largo ta dilanti porta relaciona cu celebracion di Dia di Obrero.
Sinembargo, e tema no por desaparece for di bista sigur si tene na consideracion cu cada dia e problemanan mundial ta aumenta y situacion financiero, economico y social ta bira mas insigur rond mundo.
Prijs pa cuido na hospital ta subi diariamente hunto cu prijsnan causa pa un inflacion pisa. Na mes momento e falta di siguridad kico futuro cercano lo trece pa mundo, no por wordo perdi for di bista.
No tin tempo pa perde y mester atende loke a nace for di 2010, cu ta e proyecto Hospital, cu a bira un atraccion politico si tuma nota di e forma cu gobernantenan tabata bishita e construccionnan di e proyecto.
Kico lo pasa cu Hospital? Cuanto placa mester pone riba mesa pa Hospital?
Aki ta caminda e rabo di porco ta krul y e momento a yega pa deshaci di e situacion aki.
Cu e proyecto hospital tabata uno di e proyectonan mas desastroso cu historia di Aruba a produci, ta un hecho.
Awor mester yega na un solucion concreto y manera na hopi occasion nos a trece dilanti, lo ta bon pa mira cuanto placa a gasta pa motibo cu no a atende e proyecto manera mester tabata y cuantoi placa por gasta pa remedia e situacion.
Ora papia di “remedia” hende ta bolbe na e motibo cu un ser humano ta wordo hospitalisa pa asina e hiba un lucha pa su bida.
Aki pues ta papia di algo crucial pa hende y mester busca ayudo experto awor.
Gastonan di hospital ta uno di e pesonan mas grandi pa Cuido Medico y asina tambe pa AZV, cu den e situacion actual pa su naturalesa, mester ta sumamente cuidadoso ya cu e mester cubri e gastonan di Cuido Medico na Aruba como seguro medico obligatorio.
AZV pues ta directamente mara na loke hospital ta exigi y como representante di e placa di Pueblo pa paga cuido medico, mester exigi cierto pasonan sin mas.
Cuanto placa tin disponibel, si ainda tin placa? Esaki tabata e pregunta esencial for di prome momento y te awe.
Cifranan concreto mester subi mesa y wordo discuti cu Pueblo cu no por keda den suspenso.
Mester deshaci di tension sigur den Cuido Medico, cu ya ta nabega den situacion sumanan dificil debi na e pandemia y awor guera mundial cu ta deshaci di planificacion exacto pa tur sector di un comunidad.
Costo di bida lo sigui subi.
Si ta necesario awor mester busca expertonan den e specialismo di Salud Publico, entrena pa guia e proceso di construccion, reconstruccion y e forma cu ta ekipa un hospital.
Nos ta sigui ripiti cu esaki ta un especialismo cu ta bira necesario si mira tur e gastonan cu a wordo haci pa produci loke tin actualmente.
No tin tempo mas y awor mester admiti kico tabata e motibo cu e rabo di porco ta krul y tur instancia envolvi yega na un acuerdo cu otro.
Fayo a wordo cometi den pasado. Awor ban atende loke mester atende pa habri futuro den stabilidad di e sector mas importante di comunidad.
