Resultado di investigacion nobo
MEXICO CITY: E ta algo cu nan a bin ta riparando! Cada biaha mas frecuentemente por nota cu horcannan ta intensifica rapidamente, y e chens cu ora un di nan nace y haya mas forza, e lo por yega na magnitudnan masha grandi mes, y e ta algo cu ta sigui aumenta. Esey ta loke un investigador a divulga durante un conferencia via zoom-meeting transmiti na Universidad Nacional Autonoma de Mexico (UNAM).
E instituto a laga sa Diasabra, cu e investigador di Purdue University, Dan Chavas, a papia dilanti academico- y studiantenan di Instituto de Ciencias Atmosfericas y Cambio Climatico (ICAyCC) di UNAM, den e ciclo di conferencianan ‘Panorama actual di e ciencianan atmosferico y cambio climatico’.
E specialista den applied mathematics and atmospheric science and oceanics di University of Wisconsin-Madison a corda cu Horcan Patricia cu a subi tera na Mexico na 2015 cu biento di 345 km/h, ta ehemplo di un tormenta cu a intensifica rapidamente.
“Y nos a mira comportamento manera esaki cada biaha mas frecuentemente, y kizas tin consensus mayor, y mi ta kere cu e intensidad piek ta mas dificil,” el a bisa.
El a bisa tambe cu ta “complica pa bisa si e tormentanan ta birando mas fuerte,” pero ambe a mira cu “hopi mas horcan ta yegando na e nivel mas halto”, y e ta kere cu esey ta un señal.
Chavas, kende ta doctor den Atmospheric Science, di Massachussets Institute of Technology (MIT) a ofrece un charla encuanto e uso di modelonan experimental di laboratorio pa compronde e ciclonnan tropical riba tera, y aki el a splica cu e estudionan cu computer-models ta permiti nan conoce y studia ampliamente e comportamento di e fenomenonan aki y simula nan cambionan.
El a bisa cu e uso di e sistemanan aki ta mustra con complica nan ta, y ta yuda nan haci experimento pa cambia cosnan, manera ofrece pronostico di clima, y el a bisa tambe cu eta permiti nan siguimento progresivo riba ruta di ciclon of horcan manera Katia, Irma, y Jose na 2017, y tambe Sandy (2012) cu a causa daño riba di 65.000 miyon Dollar.
E investigador a precisa cu un cantidad di cientifico importante na mundo ta trata di contesta e dudanan riba “con planeta ta birando mas cayente y ta spera cu den terminonan di velocidad y presion minimo, y ta spera di por usa e modelonan di computer pa asina compronde mihor loke ta pasando.”
Chavas ta tambe specialista den estudio di ciclonnan tropical, mal tempo, analisis y modelahe di riesgo, y su impactonan social. El a agrega cu pa conoce loke ta socede, “un di e datonan cu tabata spera di haya sa mas di dje ta temperatura di lama, cu ta informacion impoirtante pa haya sa e potencial cu un tormenta ta bay haya intensidad maximo.”
El a bisa cu estudionan recien haci door di su team, a mustra cu e intensidad di horcan a wordo afecta pa cambio climatico, pero probablemente planeta Tera ta den un punto awor unda e cantidad di yobida ta aumenta, y e intensidad por ta hopi fuerte, y tambe mas frecuente.
