Algun hefe na Hotel ta ignorando nan
ORANJESTAD (AAN): Relaciona cu e informe publica cu tabatin Job Fair y ainda diferente compania no a logra yena tur vacatura, DIARIO a ricibi reaccion di algun persona cu ta mustrando cu e mercado laboral ta mustra di ta hopi habri y cu tin cupo disponible. Pero loke no ta wordo treci dilanti ta e trato cu e clase trahador ta hayando na algun compania, incluyendo Hotelnan grandi unda den cierto caso hasta tin trahadornan fiel cu awor a cuminza sufri di malesa, y nan no ta hayando ningun tipo di compasion di e dunador di trabao.
Kizas pesey no ta hayando hopi hende cu kier bay laba tayo, pasobra e proceso di ta 8 ora largo cu man y curpa ta drenta den contacto cu detergente, tayo sushi, y tur esey ta uno cu hopi doño di trabao no ta compronde e embergadura pa ofrece e trahador ey un bon salario.
Pero loke ta bin ta saliendo hopi dilanti ultimo tempo ta e hecho cu algun trahador hopi fiel y cumplidor den sector di Housekeeping na Hotel, ta subiendo di edad y e trabao duro di pusha cama, traha cu stofzuiger, rek curpa pa haci murayanan limpi, y rek dekennan diki di sobrecama... na final di dia ta eherce un presion enorme riba e sosten lumbar di bo curpa! Esey ta e motibo pakico dolornan di lomba ta cuminza presenta su mes.
E curpa humano tin un comportacion no mucho bunita cu problemanan di lomba! Esey ta bisto cerca hendenan cu ta carga maleta na Aeropuerto, hendenan cu ta hisa carga pisa na companianan di transporte, y e trahadornan di Housekeeping cu pa 8 ora largo tin di haci cambernan limpi, seis dia pa siman.
DIARIO a bin haya sa, cu tin varios empleado na Hotelnan local cu ta confrontando problema serio cu nan lomba. Debi na esaki, riba insistencia di nan Docter, e conseho di casi tur ta pa nan slow-down cu e trabao ey den Housekeeping. Cada dia cu nan sigui haci esey, e ta empeora nan columna vertebral.
No ta djis Docter ta conseha e trahadornan aki pa nan stop mesora, y pidi Managernan pa nan bay haci un otro tipo di trabao, sino tambe na varios ocasion Docternan di Control di SVb na Aruba ta conseha esey. Problemanan di lomba ta uno cu ta crea dolornan inmenso y ta dificulta hasta canamento normal.
Nada di compasion: Loke nan ta kehando di dje, ta cu diferente manager di Recurso Humano di cierto Hotel riba e isla ta mustra ningun clase di compasion pa e problema di dolor di lomba! Nan no ta compronde, of djis no tin interes di haya sa kico e embergadura di e problema ta.
Nan ta djis bisa e trahador, cu sorry, e tin di sigui haci e trabao den Housekeeping. Mesun horario, mesun cantidad di camber, y nada menos.
Un observador a indica cu esaki ta algo cu a socede den pasado caba na Aruba. Tabatin hasta caso di Highrise Hotel cu a termina te den Corte di Husticia, pasobra nan tabata kere cu e trahador di Housekeeping ta un ‘robot’ cu tin di sigui funciona y ignora tur dolor y malestar di nan lomba.
E trahador no ta bay bisa su hefe djis pa pret cu e no por sigui traha tur dia haciendo e trabao ey! Nan ta hasta presenta cu Rapport Medico traha den exterior, cu ta indica cu e pashent no por haci e trabao ey mas. Pero nan no ta worry cune.
Simpelmente bisa, e trato ‘humano’ cerca algun Human Resources ta carece di informacion completo ta con hopi e curpa di un persona por sigui funciona unavez cu un problema lumbar presenta su mes.
Nan a insisti na DIARIO cu esaki ta pasando keto bay na Aruba, y pueblo tin di corda cu tur dia tin hopi dama trahando riba pisonan haciendo trabao di Housekeeping, cu un smile riba nan cara pero internamente ta sclamando di dolor pisa. E cos aki no mester por ta socede mas den 2022 riba e isla aki.
