Robby Rosel, Vocero --- *Ta bay exigi constancia cu e sushi a wordo tira na dump
ORANJESTAD (AAN): Vocero di Bureau City Inspector, Robby Rosel a duna di conoce cu hopi sushi ta wordo tira den mondi y riba careteranan na Aruba.
El a splica cu tin personanan cu ta haci e servicio di piki sushi, pero nan no ta bay tira e sushi na dump manera debe ser. Nan ta tir'e den mondi.
BCI ta hayando hopi di e casonan aki y pesey nan kier a trece esaki dilanti pa pueblo di Aruba por ta na altura cu lo bay tin control severo riba esaki, Rosel a remarca.
El a laga sa cu ya caba el a papia cu algun di e personanan cu a paga pa transporta sushi, pero nan no tin un prueba cu e sushi a wordo tira na dump.
Den futuro lo bay haci esaki y ta bay pidi e recibo pasobra si haya documentonan di un persona den mondi lo reparti boetnan di inmediato. Esaki lo tuma lugar entre BCI y Cuerpo Policial, a remarca.
Pa loke ta e sushedadnan den bario, a indica cu el a reuni cu directora di Serlimar, y a papia cu ne riba e topico di bari di sushi y tambe e sushedadnan di cas cu riba diadomingo, e personanan kier tira nan sushi afo.
A bin compronde cu pronto ta bay tin un solucion pa esaki. Ki dia?, esey no por bisa ainda, pero lo bay tin un solucion y e resto lo keda den man di Serlimar pa papia riba dje, Robby Rosel a señala.
