Grupo local ta desea pa haya sa kico a descubri riba su BlackBerry
ORANJESTAD (AAN): Den fin di siman, e organizacion NGO local di Rainbow Warriors Core Foundation a haci algun pregunta relaciona cu e caso penal cu a ser trata den Corte na Aruba, unda ta acusa e sospechoso Anderson Rasmijn di ta e persona cu a mata e periodista Johnny ‘Poentje’ Castro.
Milton Ponson di e grupo aki, ta recorda tur hende cu ta un periodista a pone e caso di Poentje Castro cuminza lora back. Esey a cuminza ora e periodista Luis Villegas a haci un peticion yama “Openbaarheid van Bestuur verzoek” na Hulanda. Y no lubida cu Luis Villegas a “desaparece” 6 maart 2022. Di con?
Henter e caso di Poentje Castro ta hole masha stinki mes, mescos cu e asesinato di Ulric Latham hopi aña pasa na unda un hende a ser sentencia pa asesinato y a sinta den prison pero e berdadero culpabelnan a scapa di persecucion. E tempo aya, Eva Latham, su ruman muher a denuncia Ministerio Publico pa corupto y di a falsifica y of destrui prueba.
Na Aruba tin hopi hende cu ta convenci cu Poentje Castro a ser silencia. Den henter e caso penal di Diabierna, toch no a scucha Ministerio Publico splica pakico Anderson Rasmijn lo a mata Castro tampoco.
Declaracion oficial: Pesey Rainbow Warriors Core Foundation, cu ta un NGO registra cu United Nations NGO Liaison Office na New York como un organizacion internacional pa desaroyo sositenible y derechonan humano, a emiti un declaracion oficial relaciona cu e asesinato di e periodista investigativo Johnny ‘Poentje’ Castro.
Segun Ponson, basa riba informacion suministra pa Nederlands Forensisch Instituut (NFI) despues cu periodista freelance Luis Villegas a usa e ley di Openbaarheid van Bestuur verzoek pa obtene informacion riba ki data a wordo haya riba e BlackBerry smartphone di Poentje Castro, diripiente na un forma rapido na Aruba, Ministerio Publico a core habri e caso bek na Aruba.
Y debi cu awor e caso a bira “activo” atrobe, nan a blokea cualkier procedimento di ‘Landsverodening Openbaarheid van Bestuur’ na Aruba pa obtene informacion di loke NFI na Hulanda a haya riba e BlackBerry di Poentje Castro y cu a wordo manda pa Ministerio Publico na Aruba.
Durante tratamento di e caso den Corte di Prome Instancia na Aruba dia 6 di Mei, Fiscal Patrick v.d. Biezen a indica cu e investigacion haci door di Ministerio Publico tabata “menos cu optimo” y cu Abogado pa e acusado a indica cu e documentonan original cu ta data di 2010 a bay “perdi” y cu Ministerio Publico a suministra copia solamente na Corte.
Como cu e data di e BlackBerry obteni door di Luis Villegas na Hulanda a wordo censura bastante, y e data ricibi di NFI na Ministerio Publico di Aruba awor ta protehi pa Landsverordening Openbaarheid van Bestuur, awor pueblo por djis specula loke a wordo haya riba e BlackBerry di Poentje Castro, y con esaki lo por ilumina mas e posible motibonan di su asesinato y e identidad di e hendenan di interes y posible sospechosonan.
Debi cu Ministerio Publico na Aruba den pasado rond di casonan di hende desapareci cu posibilidad cu crimen a wordo cometi, manera e caso famoso di Natalee Holloway y e asesinato di Ulric Latham a mustra instancianan similar di investigacion hopi slordig, documentonan perdi, y posible indicacion cu a manipula cu prueba, e organizacion NGO aki ta sinti cu e caso contra e acusado ta parce di ta basa riba pruebanan bieu, posiblemente incompleto, y selectivamente suministra na Corte, cu por wordo describi como pruebanan circunstancial cu backup di declaracion di testigo, pero cu pruebanan crucial forensico cu no ta completo, inconclusivo, cu tin falta, of cu a wordo teni scondi pa exclui posible otro personanan di interes of sospechoso.
Diripiente Cold-Case habri bek: E circunstancianan bao di cual e caso di profil hopi halto di asesinato di e periodista investigativo Poentje Castro a wordo declara “cold case’ y a keda como cold case pa mas di un decada, y cu a core wordo habri despues cu data di BlackBerry a wordo entrega door di NFI na e periodista Luis Villegas, y awor ta parce di ta direccion pa wordo declara ‘caso cera’ despues di e sentencia di 24 di Mei venidero, ta hole stinki y ta parce di ta un ‘cover up’.
E argumento di Fiscal cu e veredicto final di culpabilidad y e sentencia di e acusado dia 24 di Mei venidero “porfin por ta un cierre” pa e famia di Poentje Castro, ta un motibo no-satisfactorio pa trece fin na un investigacion di asesinato cu tabata hopi slordig desde comienzo y ta bay laga hopi pregunta habri pa cu e motibo real di e asesinato, y consecuentemente di e autornan intelectual di e crimen cu a wordo cometi.
