ORANJESTAD (AAN) – E cambio di temperatura na Aruba, unda tin calor pero combina cu yobida, ta genera hopi musca, y tin biaha ta dificil pa tur hende por wak si un di e insectonan aki a para riba un alimento y laga su sushi den dje, sin ser nota.
Actualmente, hopi mucha na Aruba ta hayando diarea masha pisa mes, awa awa cu slijm, dolor di stoma fuerte y hasta por haya un tiki keintura, debi podise na un virus, of kizas na un bacteria door di musca mes.
Tin mayornan cu ta worde yama for di scol pa busca nan yiuchi na scol, pasobra nan a bira malo cu diarea manera a describi. E por dura entre un pa tres dia, y ta hopi importante pa no laga pa e mucha deshidrata.
DIARIO a consulta cu un persona cu ta traha den e tereno di salud, ken a splica cu den e casonan aki por busca probiotico den botica, pa duna e menor un of dos biaha pa dia. Lastima cu un di e mihonan y hopi busca na Aruba no tin aworaki den ningun botica, pero tin otronan den forma di pildo cu recientemente a subi mercado, y cu ta hopi similar na esun likido cu no tin riba mercado actualmente.
Tambe por duna e mucha e suero pa mucha cu por haya tanto den botica como den supermercado, of por traha na cas uno cu ta consisti di awa di aroz cu un tiki sucu y un tiki salo den dje, cu ta yuda hopi lihe tambe na hidrata e mucha.
E mucha no por keda sin consumi alimento, y no ta prudente yene cu tee y buscushi soda so. E por cera su barica despues. Pero bouillon ta bon ora e af ta hopi likido, y tambe si haya sacamento cu tambe por tin. Of traha un sopi di galiña kitando tur vet di dje cu tiki salo, pero basta slap. Ora e mucha sinti su mes miho por dune pure di batata of aroz blanco, kizas un tiki pasta pero sin condimento ni tomati souce. Ora e mucha stop di bay baño, ya no ta keha di dolor di bariga, por cuminza dune su cuminda y fruta normal.
Hopi importante pa tapa e alimentonan bon pa musca no mishi cu esaki. Tin biaha hasta den frishider nan ta drenta sali, pero nan ta hopi habil pa laga no un pero hopi bacteria riba un producto. Anochi, por pone insecticida ora ta momento pa bay drumi. Esaki den sala, cushina y comedor pero no den camber. Den camber por hacie ora e muchanan ta saliendo pa scol y mayornan pa trabao.
E problema di musca ta algo serio y fastioso na Aruba y nan ta tur caminda. Mester ta hopi cauteloso cu e bari di sushi. Ta preferible pa no tira restonan di cuminda den dje, pero miho ta pa hinca nan den un sakito, tape bon y hinca nan bon cera den bari di sushi.
