Romely Flanegin, directora Tienda di Educacion:
ORANJESTAD (AAN)—Directora di Tienda di Educacion, señora Romely Flanegin, den entrevista cu DIARIO a referi na un factor di stress, cu ta e tempo cu hopi mayor por dedica na nan yiunan. Por ehemplo, e mayornan cu tin cu traha dos trabao pa mantene e famia, locual ta haci cu e tempo di calidad ta bira menos.
E mayor ta hopi cansa y no tin e tempo of e ekipahe mas pa deal cu crecemento di yiu, anto e ora ey e ta crea un situacion pisa pa e famia. “Nos ta haya hopi yamada riba e tema aki tambe, pa yuda den e parti con pa balansa e bida di traha, famia y tambe e aspecto economico, cu nos tur sa cu ta hopi pisa riba hopi famia”, señora Flanegin a señala.
Tienda di Educacion ta traha cu tur e fundacionnan, y depende kico e caso ta, nan ta wak pa ki instancia esaki ta fit y ta referi e caso na esun concerni.
Tin hopi factor di stress door di full e maneho di e sistema di cas, pasobra tin cu balansa cas, trabao, finanzas, unda e famia ta haya un acumulacion di situacionnan dificil, anto e idea ta pa yuda e famia, e mama, e tata, balansa e situacion.
“Wak cual instancia por yuda riba ki parti, p’asina baha e stress tambe den e famia p’e por funciona miho”, Flanegin a indica.
El a splica tambe con pa yega na contacto cu Tienda di Educacion. “Nos tin e liña 161, cual ta unico den Caribe tambe, cu ta brinda e servicio aki riba guia y cuido di yiu. E liña aki ta pa yama anonimo, no mester duna nomber ni informacion, sino bin cu bo preocupacion, bo pregunta y nos ta purba atende di e miho manera posible”, señora Flanegin a reitera.
El a agrega cu tambe loke ta hopi “trend” aworaki ta e Social Media, pues, Tienda di Educacion tin facebook y Instagram.
“Hopi mayor, di tur edad ta acerca nos riba e pages aki y esey tambe ta posible, cu nos ta brinda un tipo di online counseling, unda nos ta purba contesta e preguntanan di biaha, directamente riba e social media aki”, señora Flanegin a duna di conoce.
