Frank Benita hefe di maneho di RWZI:
ORANJESTAD (AAN) – Na December ultimo, DOW a manda un carta pa tur e stakeholders, entre otro AHATA y ATA, informando nan kico por y kico no por tira den riolering.
Asina señor Frank Benita, Hefe di maneho di RWZI, a menciona den entrevista cu DIARIO. E carta su meta tabata pa pasa e mensahe pa nan miembronan, pa educa nan pa asina aki por evita e tipo di storing (manera awa para) pasobra nan mes ta wordo perhudica.
Por ehemplo si e pomp di Saliña haya un daño e awa por sali contamina patras y hasta yega na Bubali Plas, cu consecuencia pa naturaleza y medio ambiente.
Frank Benita a reitera cu nan ta haya diferente tipo di material y producto cu ta wordo tira den riolering, cu eigenlijk no mester ta eyden. Esaki ta causa cu e ta tranca e pomp y e no por funciona mas. Tocante e problema cu vet di cushina, Benita a splica cu e pompnan ta wordo cendi cu sensornan y ora tin vet e ta stroba esakinan, anto ni un di e dos pomp cu generalmente tin, ta cende. Ora desperdicio ta wordo tira den e riolering, cu ta pega un pomp, e otro ta keda funciona dependiendo di kico tur ta wordo tira.
E ora ey DOW ta sali haci e pompnan limpi y pone nan bek den servicio. Locual tin den plan pa futuro ta cu ta bay moderniza e sistema di alarma, unda cu picket dienst por haya sa directamente di su telefon ora cu un pomp of tur dos cay afo, of si e nivel di awa ta hopi halto, pa nan por reacciona mas lihe. Actualmente, esaki ta tuma lugar door di e central di polis (100) cu hende ta yama ora wak kico ta sosode, pero tambe nan ta haya melding di taxistanan y otro partinan di comunidad, y DOW ta sali resolve e problema.
