ORANJESTAD (AAN): Manera a informa caba Fundacion Corector di Papiamento a cuminsa cu un curso di nivel avansa cu ta e curso ‘Dominio di Idioma’.
Na october aña pasa FCP a habri inscripcion pa e prueba di admision pa e curso y na luna di januari 2024 e curso a start sali. E curso tin 4 modulo y na final e cursistanan lo tin mas conocemento y dominio di nos dushi Papiamento.
Dr. Joyce Pereira y Sr. Ramon Todd Dandaré Mag. Ling. a gusta e idea di e curso avansa aki y a pone nan experticio disponibel pa e docentenan por a cuminsa hinca e contenido di e curso den otro. Tin 3 docente di Papiamento cu a pone nan mes disponibel pa duna e curso cu ta tuma luga tur diasabra na Biblioteca Nacional Aruba. E curso a cuminsa cu un total di 21 participante cu ya caba tabatin un base di conocemento di Papiamento.
Di mes pa hinca un curso asina den otro tin gasto envolvi. Ta pa e motibo aki Fundacion FCP ta gradici Aruba Bank cu a kere den e curso y a contribui cu un donacion pa e preparacion y na UNOCA cu a mira e importancia di un curso asina pa nos idioma Papiamento y ta cofinancia e proyecto aki. Tambe FCP ta hopi gradicido na BNA cu semper ta habri su portanan y salanan pa fundacion organiza su cursonan y otro actividad.
FCP ta gradici tur cursista pa e confianza y ta desea nan hopi exito y perseverancia pa sigui te na final.
