Solange Tchong, PR di AZV:
ORANJESTAD (AAN) – Periodo di vacacion grandi ta na caminda, y mirando cu hopi famia ta bay afo pa e temporada aki, Relacionista Publico di AZV, Solange Tchong, den entrevista cu DIARIO kier a recorda comunidad cu seguro di AZV ta valido na Aruba so.
Pues, ta hopi importante ora di bay cu vacacion afo percura pa cumpra un seguro di biahe.
“Seguro di biahe tin, entre otro, e cobertura pa gastonan medico inespera y semper ta importante pa cumpra esey, banda di cu tin otro componentenan tambe, por ehemplo si bo maleta ta wordo perdi, of si bo a perde camara, etc., e seguro di biahe ta cubri esey”, Solange Tchong a menciona.
El a comenta tambe cu ningun hende kier bay cu vacacion cu un preocupacion pero kier biaha trankil. Pues, e miho recomendacion di parti di AZV ta: “Si bo ta bay vacacion e lunanan Juni, Juli, Augustus, cu muchanan cu ta finalizando examen kier bay cu vacacion, of e mayornan ta planeando esaki, corda tambe den organizacion di bo vacacion pa cumpra bo seguro di biahe, cu ta hopi importante”, Solange a reitera.
El a agrega cu tin hopi compania di seguro priva eyfo cu ta bendiendo seguro di biahe, tanto si bo ta cliente of esnan corto cu bo por cumpra los pa e periodo specifico cu bo ta bay.
Solange Tchong a trece dilanti tambe, cu pa loke ta studiantenan den preparacion pa studia afo, pa keda den contacto cu Departamento di Enseñanza pa locual ta e seguro. SVb ta na spera pa haya e informacion, y generalmente AZV, e ultimo añanan, semper a traha hunto cu Departamento di Enseñanza pa prepara e grupo di studiantenan, vooral esnan cu ta bay Hulanda.
“Semper nos ta prepara informacionnan pa nan, na unda e studiante ta haya sa na unda e por download e AZV app, pa asina te ultimo dia cu e ta na Aruba ainda e ta segura pa AZV” Tchong a señala.
