Dr. Marck Oduber ta splica:
ORANJESTAD (AAN) – Dr. Marck Oduber “Chair of the board of IOCARIB”, Experto Cientifico pa UNESCO Aruba, den entrevista cu DIARIO a comenta cu hopi hende ta lubida cu no ta Caribe so, pero Nacionnan Uni tambe a lubida cu mundo ta, principalmente, lama.
Hopi biaha, ora ta papia di cambio climatico y su efectonan, hende ta lubida lama, cu ta un partner importante pa e parti di clima.
Oduber a subraya cu “un bon ehemplo ta cu nos ta den temporada di horcan, y hopi hende ta bisa cu nos tin El Niño, cu ta yuda nos pa mengua e posibilidad di e olanan tropical, of haci nan mas debil, aunke e ta haci Aruba mas seco, lamentablemente. Pero un fenomeno cu nos tin cu ta relaciona cu lama, eigenlijk, cu cambio climatico, ta cu lama ta keda wanta sla y wanta sla tur e tempo akinan, y e parti Atlantico bin for di Europa, core Africa, bay te Area Caribense, ta mas cayente cu normal. Ainda nan ta investigando, pero e motibo principal cu tur hende ta bisa cu si ta e causa, ta e cambio climatico cu lama ta keda absorbe y absorbe, y esey ta pasando”, Oduber a señala.
Ki importancia lama tin? “E aña aki, den temporada di horcan, mester bay wak ken ta gana e bataya. Nos tin E Niño, cu normalmente ta baha e actividad pero bo tin di un banda e actividad Atlantico cu ta haci mas calor cu normal. Anto, e ora ey mester wak con ta balansa. Si bo wak den e pronostico di tempo na plazo largo, por wak cu tin cu ta normal, pero tin cu ta indica cu ta mas activo cu normal. Pues, e ta depende con e modelonan ta traha; pero ta un parti importante pa sigui, fuera cu lama ta mas calor cu normal ora cu tin actividad ciclonico, cu tin efecto riba tur loke tin riba lama”, Dr. Marck Oduber a comenta.
El a agrega cu un parti cu el a wak den IOCarib, cu ta bay ta un prioridad pa IOCarib tambe, den e parti entre Merca cu Brazil, ta cu tin efectonan secundario y un di nan ta cu tin hopi mas alga peligroso den e region Caribense y hasta a causa morto den cierto regionnan di Caribe, y e ora ey un programa di IOCarib yama Anca, ta desaroyando un “early warning system” pa alga.
