Minister Ursell Arends y Departamento di Adulto Mayor a constata:
ORANJESTAD (AAN): Tin indicacion cu tin varios persona cu a bin for di exterior y cu ta interesa pa duna cuido na adultonan mayor, y nan ta bisa cu nan tin e preparacion necesario, pero nan no ta hayando permiso, nan no ta keda cla cu nan papelnan, y na cierto momento nan tin cu bay bek nan pais.
Esun cu ta keda cu e problema di falta di mas hende capacita pa duna cuido, ta e adulto mayor mes. E tema aki a surgi como pregunta y comentario pa Minister Ursell Arends, di un miembro di prensa, den sentido si el a trata e tema aki cu e Departamento concerni.
E minister a contesta cu no solamente su Ministerio, pero e Departamento di Asunto di Adulto Mayor, hopi biaha no por a verifica e diploma, of preparacion cu e hendenan aki tin, of bisa cu nan tin.
“Na e momentonan aki, e departamento di Adulto Mayor ta preparando pa crea alianza cu institutonan, pa asina aki nos por educa e personanan cu ta brinda e servicio di cuido aki, sea na cas di e adulto mayor of den cas di cuido, y di e forma aki eleva e calidad di cuido”, Minister Arends a bisa.
El a señala si, cu hopi biaha nan ta bisa cu nan tin cierto preparacion pero ora nan mester yega pa provee documentacion p’asina aki por haci un analisis pa wak si di berdad nan tin e preparacion aki, nan no por prueba esaki. Esey ta loke ta impedi cu e personanan aki por subi e mercado pa atende cu adulto mayor” e mandatario a subraya.
E tema aki tin Minister su atencion y Directie Ouderenzaken ta trahando pa organiza esaki na un forma debido, pa tur hende cu tin na Aruba caba, cu tin e preparacion necesario pa yuda, atende y duna bon calidad di cuido y servicio, na nos adultonan mayor, lo zorg pa esaki wordo atendi cu ne, e mandatario a remarca.
