Minister di Economia Geoffrey Wever:
ORANJESTAD (AAN) – Minister di Economia, señor Geoffrey Wever, den conferencia di prensa cu a tuma lugar na SETAR NV, a expresa cu e momento aki ta hopi importante y bunita pa Gobierno, pa wak con SETAR, un compania estatal di cual tur accionnan ta den man di Gobierno di Aruba, ta duna un stap asina importante pa ofrece su clientenan un programa mas flexible, unda cu nan por scoge e producto cu nan ta desea y por paga pe den su hogar.
“Nos ta contento pa wak cu e compania estatal ta inverti pa por haci esaki posible, y tin e vision tambe pa scucha di su clientenan. Awor cu mi a bira minister, den un di nos prome reunionnan nos ta toca e tema aki, y mi ta contento pa bisa cu ya Gerencia di SETAR tabata tin e vision aki, pa implementa e proyecto aki, y cu aworaki el a bira realidad”, e dignatario a expresa.
El a agrega cu aworaki e servicio ta mas personaliza, y tambe ta tene cuenta cu e capacidad financiero di cada hogar y pa mira tambe cu SETAR ta inverti speed.
“Nos ta mira cu conectividad ta algo sumamente importante den e tempo moderno aki pa educacion y pa economia den su totalidad di Aruba, como pais moderno, y SETAR ta un parti estrategico den esaki”, e minister a subraya.
El a agrega cu SETAR ta esun responsable pa e proeza aki, y como gobierno nan ta hopi contento y agradecido pa e vision cu SETAR tin y e inversionnan cu ta wordo haci, y pueblo por wak cu e compania estatal aki ta wordo maneha na un forma serio y ta tene cuenta cu e deseo di tur e ciudadanonan.
El a reitera cu esaki ta un bunita momento y el a gradici señor Roland Croes pa e proyecto aki, y tur e empleadonan di SETAR, pa ta parti di e proyecto.
“Manera señor Croes a menciona, tur empleado ta traha dia y nochi pa por logra e tipo di innovacionnan aki den nos pais, y nos como gobierno ta sumamente agradecido y cada un di e empleadonan y e vision cu gerencia a pone outline; tambe na e Hunta di Supervision di SETAR cu ta aproba e tipo di proyectonan aki” Minister Wever a reitera.
