Apertura di olimpiada ta awe - ORANJESTAD (AAN): E weganan di Tokyo 2020 ta inicia 23 di juli 2021 y Aruba su delegacion ta na Tokyo cla pa representa nos den olimpiada.
E olimpiada yama “Tokyo 2020” pa motibo cu e mester a tuma luga aña pasa, pero a wordo posponi pa e aña aki pa motibo di e Pandemia. Prome Minister Evelyn Wever - Croes ta haci apelacion na henter comunidad pa sintonisa e acto inaugural cu lo inicia diabierna 23 di juli desde 7or di mainta pa mira Aruba su delegacion den e desfile y participando den e weganan den e dianan venidero.
Aruba ta e di 10 pais den e desfile, pues ta calcula cu despues di 7:30 di mainta Aruba lo ta na turno. Lo ta sumamente emocionante y bunita pa mira Aruba su atletanan y nos bandera durante di e ceremonia di apertura.
