Seccion Hubentud den Movecion a acerca y puntra un par di hoben, cu tabata wardando bus, den kico mas tanto nan ta kere awendia?
Algo cu sigur ta positivo ta cu nos hubentud, alomenos hopi di nos hobennan ta kere den Dios. Nan ta lanta den hogarnan Cristian, sea Catolico of otro nominacion, pero importante ta cu nan tin Fe den Dios, aunke kizas no di mes manera cu nan mayornan, welo y welanan. Pero si nan ta convenci cu mester tin balor y principionan.
No obstante, por ripara cu nan tin un tendencia na un individualismo, aunke nan ta menciona hopi e expresion “crecemento personal” como un meta, y ta defende valor y principionan, sostenibilidad y husticia social, como tambe nan ta busca solucionnan practico.
Stabilidad den educacion y trabao ta prioritario pa nan, y algun tin inclinacion na spiritualidad no institucionaliza, nan ta kere den e karma, ta haci meditacion, ta stima naturaleza, y tin Fe den astrologia, ta kere den hende cu ta eherce adivinacion, mientras otronan si ta kere y practica e contexto religioso tradicional.
Encuanto e epoca di Pasco di Nacemento, nan ta conoce e esencia di pakico mundo Cristian ta celebra, y nan ta kere den esey, pero nan ta mezcla esaki cu paña nobo, fiesta, comemento, regalo, probecha sali cu amigonan e dianan liber cu no tin scol.
E idea di tin un cena familiar nan ta mir’e bunita y agradable pa celebra Niño Hesus, pero pa dispidi di aña y yama bon bini na aña nobo, nan ta prefera ta pafo di cas, bay wak pagara banda di lama, y brinda cu nan amigonan pasobra nan kier tambe goza nan libertad. No tur ta haya ok di nan mayornan y tin cu festeha na cas, “si of si” segun un mucha a bisa. En todo caso, principal ta cu nan tin bon salud, trankilidad, y paz den e temporada aki.
