Jonathan Upegui di CBS:
*Ta pidi esnan cu falta pa tambe colabora
ORANJESTAD (AAN) – Manera ta conoci, Oficina Central di Estadistica di Aruba (CBS), a cuminza, den luna di April, cu un encuesta bao “Economic Census 2023”, pa haci un conteo di tur e negoshinan activo cu tin den e Isla.
Jonathan Upegui, Hefe di e Departamento National Accounts na CBS, a subraya den entrevista cu DIARIO cu e meta no ta pa bay belasting cu e datonan, sino pa actualiza nan registracion, y e structura economico di Aruba, cu ta algo cu mester haci cada tanto aña.
El a comenta cu Aruba no tin un economia cu ta cambia dje hopi ey, pero mester corda cu na 2012 e refineria a cera, y esey tabata un golpi hopi grandi pa Aruba su economia unda cu hopi negoshi a cera.
El a subraya cu den paisnan grandi nan ta haci hopi di e estudionan aki, sea cada aña of cada dos aña, y Nacionnan Uni ta recomenda pa Aruba tine cada cinco aña, pero como cu e no ta cambia asina hopi, ta hacie cada diez aña. A purba si, pa hacie mas trempan pero e pandemia a bin. No obstante, despues di e pandemia ta net bon pa wak e structura di Aruba su economia.
“Nos ta hacie pa update nos sistema di cuentanan nacional (National Accounts) y esey ta pa calcula nos GDP na un manera hopi miho. E motibo ta solamente estadistico, pa nos crea miho estadisticanan y mas al caso pa nos mes, pero tambe pa institutonan internacional, manera IMF, Banco Mundial, etc., tur ta pidi nos estadisticanan, y nos kier ta na e nivel mas halto cu e paisnan grandi”, Upegui a señala.
El a agrega cu door di e Censo Economico CBS por duna diferente estadistica manera e logisticanan, unda tin cierto companianan, cual sector ta cay den cual region di Aruba. Pues, e por yuda sigui maneho di gobierno. CBS mes no ta traha riba maneho pero ta suministra e estadisticanan na esnan cu ta eherce e maneho.
Upegui a menciona cu nan ta hayando hopi cooperacion caba di comercio y e ta gradici tur esnan cu ta coopera, y na esnan cu ta nenga of bisa cu nan no tin tempo, por fabor tuma tempo; e ta dura un 20 pa 30 minuut so. El a bisa cu di e average di companianan simple ta tuma menos di cinco minuut.
