Frans Ponson, presidente di CUA:
- Comerciantenan mester haya vrijstelling di BBO riba transaccion, mescos cu banconan
ORANJESTAD (AAN): Frans Ponson, presidente di Comerciantenan Uni Aruba (CUA), a sigui declara den conferencia di prensa, cu nan a bin haya un ley cu a hala nan atencion, y nan kier a trece na atencion di Gobierno.
“Tin un ley cu gobierno a pasa cu ta duna tur banco ‘vrijstelling’ di paga BBO riba transaccion. Tur banco! Y nos tin e den nos man akinan. Fine! Pasobra nos ta compronde cu riba cash bo no ta paga BBO, no tin ‘transaction fee’ riba dje, pero door cu banco ta bay cobra nos e 4%, 3%, 2% of 1% aworaki, ora mi paga DIMP, no ami so pero tur e comerciantenan chikito aki, nan tin cu paga BBO riba e ‘transaction fee’ aki, tambe.
“Esey kiermen cu banco no tin cu pag’e, pero e comerciante si tin cu paga DIMP. Kiermen, nos ta haya cu si banco no tin cu paga BBO riba un ‘transaction fee’, nan ta full exento, nos tin cu exonera e comerciante tambe di e BBO riba e transaction fee. Banco ta cobra nos esaki y nos mester cobra pueblo BBO riba dje y duna belasting”, Frans Ponson a vocifera.
El a agrega cu CUA a tuma nota di un video cu e minister di Economia actual, a sali bisa cu nan tin un ley cla, pa bay proteha e consumidor. “Nos ta contento di tende esaki. Nos ta wardando wak ken ta bira Minister di Finanzas pa nos sinta cu ne di biaha, y nos ta contento di a tuma nota di esaki, pero nos kier bisa gobierno tambe di biaha, tuma nota cu banco no ta pagando BBO riba e transaction fee, pero comerciante si mester cobra pueblo esaki; kiermen, nos a keda mesun leu, pueblo ta paga p’e toch!”, Ponson a remarca.
Pues, e ora ey e comerciante tambe mester haya e beneficio di hala atras esaki fin di luna, tur e BBOnan di transaction fee pa kit’e bek. Pasobra e cos aki, si nos no pasa e ley lihe, y e cartanan ta bisa cu 1 di April e cos aki ta cuminza, ya riba Social media ta mira hopi negoshi ta bisa e consumidor bin cu cash, pasobra si no, nan tin cu subi prijsnan.
“Mi no ta kere cu tin comerciante kier subi prijs, nos ta hasta pensa cu nos tin cu nos por lague pafo di e prijs mescos cu nos a papia antes di BBO y si bo bin cu carchi nos ta cobra bo apart, pero banconan no kier esey, banconan kier pa nos scond’e den prijs mescos cu gobierno. Mi ta kere, gobierno mester atende cu e asunto aki, pasobra 1 di April ta hopi cerca, hopi prijs lo bay subi, mirando e charges aki di cada banco, y nan por cobra loke nan kier, pasobra nan tambe ta comerciante”, Frans Ponton a enfatiza.
