ORANJESTAD (AAN): Un situacion confuso a presenta su mes Diasabra anochi laat den area di Papilon, ora cu Central di Polis a wordo notifica cu un asalto a socede riba un homber di edad grandi.
Mesora un unidad di Polis di Santa Cruz a wordo manda na un adres na Papilon, como cu e ciudadano a raporta cu e ta coriendo su auto compacto color blauw y a bay pa topa un muher na Papilon.
Ora cu el a yega dilanti e cas na Papilon, pa su sorpresa enbes di topa cu e muher, ta seis homber a sali diripiente for di scuridad y a atake. Nan a yega violentamente riba dje, y cu e.o. cuchiu den man a cuminza menaze. Nan a rek man y kita e smartphone cu e ciudadano tabatin. Uno a pasa man pa habri e hood di e auto, y nan intencion tabata pa bay cu e bateria di auto tambe.
Durante e asalto aki, e victima a logra los y huy for di e grupo, y na careda el a bay laga nan atras cu auto y tur cos. El a core bay te na cas di otro hende eybanda, unda a bati alarma.
Ora cu Polis a yega, ya caba e seis asaltantenan a desaparece. Pero Polis a seya e area rond di e auto compacto, y mirando cu tin varios vingerprint, nan a core pone Atraco Team y tambe team forensico di BFTO pa acudi na e adres. Atraco Team ta bay interoga e victima pa asina compronde e storia aki mihor, y tambe cuminza investiga e asalto aki.
Si tin hende cu por a mira loke a socede, nan ta ser pidi pa contact Tipline di Polis na 111-41 pa duna detaye. Corda cu nan ta garantiza cu bo por keda anonimo.
