Ronnie Alders, Coordinador na Biblioteca Nacional Aruba:
ORANJESTAD (AAN): Recientemente na Biblioteca Nacional Aruba na Playa a tene un bunita actividad hunto cu Women's Club of Aruba y otro stakeholders camina a planta 20 mata na 'Hofi Joy'.
Ronnie Alders, Coordinador na Biblioteca Nacional y Coordinador di 'Hofi Joy' a duna di conoce cu hopi aña pasa e nomber 'Hofi Joy' tabata zona na Biblioteca Nacional di un manera familiar, no oficial pasobra na 2012 a cuminsa cu e 'Green Education Symposium' cu despues a bira 'Sustainable Education Symposium' cu durante 12 aña largo tabata centro di lecturanan pa tur locual tin di haber cu sostenibilidad, energia sostenibel, agricultura, cria, awa, pa scolnan secundario y educacion avansa.
Astrid Britten, Directora di BNA a agrega na 2013 a participa den un proyecto di Aruba Doet, Biblioteca a dicidi cu ta bay planta un par di mata di fruta rond di e edificio. Tabatin un trahador cu tabata gusta naturalesa. E meneer aki tabata Johannes 'Joy' Rasmijn. El a yuda masha bon mes cu e proyecto ey y masha hopi hende a colabora, el a indica.
Pa su proximo aña, na 2014, Joy a fayece di un forma inespera. Durante un Dia di Biblioteca a bin cu e idea pa crea un hofi y pone e nomber di 'Hofi Joy'. Asina e idea di 'Hofi Joy' a inicia. Despues di un pari di aña a bin cu e idea pa relansa e concepto ya cu den pasado no a bay den profundidad pa haci esey, Britten a splica.
Parti di e 'community garden' tabata un di e temanan tambe di e 'Sustainable Education Symposium' unda BNA a coordina e tema di 'Hofi Joy', cual ta pas cu e concepto di 'community garden' den ciudad y cu awendia ta hopi importante, el a expresa.
Ronnie Alders a agrega cu na 2018, e 'Sustainable Education Symposium' tabata relaciona cu matanan medicinal y esun di aña despues tabata 'community garden' y esaki ta dos simposio cu a haci un impacto hopi grandi riba hopi studiante, maestro, comunidad y riba biblioteca mes. Pa dos aña consecutivo, a haya record di scolnan y bishitantenan publico na Cas di Cultura.
El a indica cu e aña di e matanan medicinal a yena Cas di Cultura completo. Biblioteca Nacional Aruba ta focus hopi den duna atencion na e entrepreneurnan local, tur esnan cu ta duna atencion na productonan sostenibel, organico.
E rol di BNA den comunidad tin un rol social, educativo, literario y artistico hopi importante. Aruba ta un isla chikito y pesey a dicidi tambe pa ademas di e simposio educativo di sostenibilidad, pa duna hopi mas atencion na 'Hofi Joy'.
