ORANJESTAD (AAN): Tur cos ta mustra cu e storia cu e hoben Suyari Petronia cu a ser haya door di autoridad cu tiro den su cabez na un cas den Flamboyanstraat na San Nicolas, no a wordo mata estilo ‘ehecucion’ manera algun persona a specula.
Informacion nobo ta mustra cu e dama hoben di 19 aña di edad a muri accidentalmente. Aki a splica cu un di e hobennan cu tabatin e arma den su man, a trompica y e tiro a los accidentalmente. E shot a bay directo pa cabez di e dama hoben.
Esey ta e storia cu e hobennan ta contando den nan defensa di loke a pasa Diabierna siman pasa. Despues di esey nan a sali bay di spanto. Despues pa 4:20 am, yamada a drenta na Cuerpo Policial, y e notificacion espantoso cu un muher a wordo tira na e cas na Flamboyanstraat.
E pensamento robez cu lo ta trata di algo ‘execution’, a bin debi cu a pensa cu e sala di cas ta chikito, pues e no por ta un tiramento di leu. Pero awor e storia di trompeca y accidentalmente e tiro a sali di e arma, lo por ta algo creible. Ta keda awor na e autopsia pa mira e angulo cu e proyectil a dal e cabez. Tambe e investigacion forensico di BFTO cu ta analisa e lugar di unda e tiro a los, y e proyectil a bay unda e dama hoben tabata sea para of sinta den sala.
Mientras tanto e investigacion ta sigui, y e dos sospechosonan di 17 aña di edad ta deteni keto bay.
