Minister Arthur Dowers ta lamenta:
ORANJESTAD (AAN)- Minister di Husticia, señor Arthur Dowers, den entrevista cu DIARIO a duna di conoce cu a keda demostra cu tin hopi arma di candela ta circula na Aruba, y el a indica kico ta e plan cu tin pensa pa haci.
“Na prome lugar t’asina aki cu nos tin tur e servicionan cu ta traha normalmente, pa atende cu arma, cu ta polis principalmente, pero tambe tin otro departamentonan cu ta responsabel, por ehempel Kustwacht pa frontera, y eynan e comunicacion y controlnan ta cuminza”, Minister Dowers a señala.
“Pero mi ta haya hopi importante pa realiza, cu tin cierto gruponan den comunidad cu no ta di awe, pero cu hopi bez nan ta meti den e tipo di delitonan aki, a mira hopi di nan cu a wordo cera, y loke por a mira tambe ta, cu na momento cu nan ta sali for di prizon nan ta bay bek den e mesun tipo di delitonan aki” e dignatario indica.
Minister Dowers a bisa cu tin un ley skirbi diez aña pasa, cu no a logra pasa nunca, pero cu aworaki ta pa bay Parlamento, y ta spera di por conta cu Parlamento tambe bay riba dje, pa por aumenta e posibilidadnan pa husticia por actua, principalmente den barionan y den cierto areanan caminda cu por mira cu tin cosnan ta bay for di man, y cu eigenlijk como gobierno, no por actua preventivo. “Si algo pasa bo por actua, pero no por actua di antemano”, Minister Dowers a señala.
E ta corda como diez aña pasa, tabata tin otro area unda cada bes tabata tin e mesun tipo di delitonan aki, unda nan a detene hopi hende y nan a wordo cera y pa hopi aña.
“Mi ta corda un di nan cu a bay cera, cu tabata meti den atraco y tiramento, etc., segun mi e tabata tin 18 aña, despues di 12 aña el a logra di sali, y pa mi sorpresa den e periodo cu e tabata afo aki, el a cay atrobe, den mesun asunto di arma y crimen, y aworaki e tin cu bay bek bay sinta e resto di añanan, plus el a wordo persigui di nobo pa posesion di arma y crimen”, Minister di Husticia a señala.
E mandatario a bisa cu manera ta conoci, gobierno a bin cu e “Cas di siguridad” y tin añanan largo ta discuti con pa atende cu e problematica di hobennan, na un manera mas integral, y ora di atende cu e problema di hoben over di husticia, bo ta hacie door di e perspectiva di proteccion y siguridad.
