Na final di siglo XVI:
ORANJESTAD (AAN) – E investigador Edwin Andres Rodriguez Pulgarin, den su relato tocante e evolucion historico di turismo, na final di siglo XVI a nace e costumber di manda e hobennan di e aristocracia ingles, na haci e viahe cu nan a yama e “Grand Tour”, ora nan tabata caba nan estudionan secundario.
E meta di e “Grand Tour” tabata pa nan complementa nan formacion y adkiri cierto experencianan. E tabata un viaje di duracion largo (entre 3 cu 5 aña) na diferente pais di Europa. E studiantenan a haya e nomber di turista, y di eynan e palabra turismo, turista, a origina.
E Grand Tour tabata un viahe motiva door di e necesidad di instruccion di e hobennan aristocrat aki, cu den futuro lo mester a goberna nan pais.
Di e conocemento “in situ” di e grandeza di Roma, Paris of Atenas, mescos cu e debatenan den e cafénan di e centronan termal grandi, e viaheronan mester a siña con pa hiba e timon di un Imperio, manera esun Britanico. Pa algun autor, esaki ta e autentico fundeshi di e turismo moderno, ya cu e ta surgi como un fenomeno revolucionario parallel na e resto di e transformacionnan cu a worde ilustra den e articulo aki. Asina Rodriguez Pulgarin ta indica.
Tambe, den e epoca aki tin un resurgimento di e awanan termal cu a decae durante e Edad Media. No solamente tabata asisti na nan door di conseho medico, sino tambe a bin na moda e diversion y entretenimento den e centronan termal, por ehemplo na Bath na Inglatera. Tambe durante e epoca aki a descubri e bañonan di baro, como remedi terapeutico. Esaki a tuma lugar den e playanan frio di Niza y Costa Azul, na unda e personanan tabata bay tuma nan baño door di prescripcion medico. Cu e Revolucion Industrial ta worde consolida e burguesia cu a bolbe dispone di e recursonan economico y tempo liber pa viaha.
Edad contemporaneo: Durante e Edad Contemporaneo a surgi e invento di e machine di vapor cu a suppose un reduccion espectacular di e transporte, cu te e momento ey tabata hala pa animal. E lineanan di train tabata worde extendi cu gran rapidez na henter Europa y Norteamerica. Ademas, e uso di e vapor den navegacion tabata reduci e tempo di e desplazamentonan.
Ta cuminza surgi e turismo di seroenan of salud. A construi e famoso sanatorio y clinicanan priva europeo, y hopi di nan a yega te awendia como hotelnan chikito cu encanto.
Na 1841, Thomas Cook a organiza e prome viahe organiza den historia. Maske el a resulta den un fracaso economico, e ta considera un exito rotundo encuanto e precedente di e pakete turistico, pues a percata di e posibilidadnan economico inmenso cu e actividad aki lo por a genera, creando asina na 1851 e prome Agencia di Viahe na mundo: “Thomas Cook & Son”.
