ORANJESTAD (AAN): Siman pasa un malesa hopi cruel a ataca un hoben na Aruba, y apenas algun dia despues el a fayece.
Diasabra anochi a drenta informacion cu e hoben Joseph v.d. Linden di 17 aña a fayece. E culpa di tur esaki ta e infeccion di membranonan cu ta proteha e cuerda spinal y cerebo, esta e ‘meninges’.
Ora cu e membranonan aki haya infeccion, nan ta hincha y ta primi riba e cuerda spinal y bo cerebro. Esaki por causa problemanan cu ta peligroso pa bo bida.
Meningitis Bacterial ta un malesa serio! Hopi biaha hendenan cu haya e infeccion aki diripiente, y ta fayece di dje. Y morto ta bati na bo porta apenas algun ora despues.
Toch mayoria di hende ta logra recupera di Meningitis Bacterial. Pero esnan cu ta recupera, lo por tin desabilidad permanente, manera daño na cerebro, perdida di oido, y desabilidadnan ora di bay scol.
DIARIO ta na altura cu na Aruba tin varios persona adulto, cu debi na e Meningitis Bacterial aki a keda sordo pa resto di nan bida.
Loke ta causa Meningitis Bacterial: Tanto bacteria of un virus por ocasiona meningitis. Meningitis Viral ta mas comun, pero Meningitis Bacterial ta esun mas serio. E por contribui na daño na cerebro, paralisis, of atake. Den algun caso, e por ta fatal.
Hopi tipo di bacteria por ocasiona meningitis. Ta existi vacuna cu ta purba ataca hopi di e bacterianan aki, y pesey ta importante pa haya sa kico ta causando e meningitis. Aunke tur tipo di bacteria ta afecta e mesun parti di e curpa humano, toch nan por produci diferente resultado y pesey cada uno mester di diferente tratamento.
Expertonan no semper sa di con meningitis ta aparece. Algun hende ta haye debi cu nan sistema di inmunidad ta debil, of kizas recien nan tabata malo. Un herida na cabez tambe por aumenta e riesgo.
Meningitis Bacterial ta mas comun cerca babynan di bao di 12 luna, y tambe cerca hobennan di 16 te cu 21 aña di edad.
Sintomanan ta yega diripiente: E sintomanan mas comun di Meningitis Bacterial ta: (*) Nek dolor y hopi stijf, y casi bo no por bira bo cabez. (*) Dolor di cabez. (*) Keintura halto. (*) Bo ta sintibo confuso of tin soño. (*) Bo ta haya herida demasiado facil rond di bo curpa. (*) Rash ta aparece riba cuero. (*) Hopi sensitivo pa luz.
Algo cu ta spanta tur hende, ta cu e sintomanan aki ta aparece rapido, den menos di algun ora of kizas maximo den un dia. Pesey si bo sinti cu un hende tin Meningitis, ta mihor pa hibe mesora pa Servicio di Emergencia na Hospital.
Pasobra aki tin di identifica e bacteria rapidamente, pa dicidi ki antibiotica ta bay duna e pashent, y esaki tin di wordo haci directo cu hangua. Kizas ta duna corticosteroid tambe pa yuda reduci inflamacion y hinchamento, y bo por haya hopi liquido pa evita cu bo ta dehidrata.
Den e caso di e hoben na Aruba, e tambe a cuminza sinti su mes malo. Apenas Diahuebs siman pasa a bin haya sa cu e tin Meningitis Bacterial, y su condicion a keda empeora, y el a hasta bay for di tino. Famianan a keda cu speranza cu e lo por bin bek, pero riba Diasabra a haya sa cu e hoben su salud a deteriora rapidamente, y ya e tabata clinicamente morto.
Diasabra anochi a drenta e informacion cu e hoben, mihor Joseph Anthony v.d. Linden, conoci como ‘Chupito’ y tambe ‘Tuki’ a fayece. Docentenan di SPO Brasil riba social media a describi Joseph como un alumno stima, kende tabata trece alegria na scol. Su fayecimento a laga nan tur sorprendi, pero nan lo keda cu e bunita recuerdonan atras, principalmente su sonrisa y locuranan.
Su fayecimento a laga su amigonan cu dolor grandi. E tabata activo tambe den Futbol y demas actividad fisico. Joseph ta naci na Aruba dia 26 di April 2005, pues tin 17 aña di edad. Corda cu solamente Meningitis Viral por ta contagioso, pero otro hendenan lo no haya e malesa asina facil.
Na famia, amigonan, y bisiñanan di e hoben aki, DIARIO ta expresa su mas profundo palabra di condolencia.
